O Expediente de Regulación de Emprego de Novagalicia Banco afectará a 650 persoas

Novagalicia Banco comunicaba este luns ás organizacións sindicais que a entidade ten que aforrar 50 millóns de euros anuais en gastos de explotación, que sobran 250 persoas nos servizos centrais de Galiza e entre 350 e 400 na rede 2. Excedentes que xustifican polo peche de 110 oficinas. O total de persoal excedente é de 650 persoas, en 2012, sen descartar novos recortes para o ano que vén.

CIG-Banca explica que nesta xuntanza, a Dirección da entidade, logo da oferta de dialogo, apareceu acompañada de 3 asesores externos do despacho de avogados de Madrid de Sagardoy, ademais de 2 avogados internos de Relacións Laborais. Ante isto, o secretario nacional de CIG-Banca, Clodomiro Montero, sinala que “entendemos que non é de recibo ofertar diálogo e xudicializar as conversas” e advirte que “a CIG valorará se asiste ou non ás seguintes reunións ou se envía a avogados do sindicato”.

Segundo Montero, a primeira parte da reunión foi unha exposición sobre a situación económica mundial, europea e do Estado, coa fin de xustificar as medidas que propuxeron posteriormente. “Despois de hora e media dunha clase de marcoeconomía que non compartimos nin pedimos” foi cando recibiron a noticia: hai que aforrar 50 millóns de euros anuais en gastos de explotación e que sobran 250 persoas en SSCC-Galiza e 350/400 na rede 2, excedentes este último xustificado polo peche de 110 oficinas. Este excedente total de 650 persoas é para o ano 2012, sen descartar novos recortes para o ano que ven. Segundo a CIG-Banca, outros sindicatos pediron que as medidas afecten a toda a rede comercial, incluída a rede galega, “todos traballamos na mesma empresa”, argumentaron.

A CIG-Banca asegra que a Directora de Persoal incidiu en que os investidores privados agardan a que se reduzan gastos e persoal para entrar. Pero Martín Godinio de Sagardoy dixo que o excedente era froito da integración (non aclarou integración con quen). “Preguntamos á Directora de Persoal si na vindeira reunión comezaba o período de consultas ao que contestou que si, mentres que Martín Godino dixo que non. É dicir versión contraditorias, nunha cuestión tan sensible para todo o cadro de persoal”.

Segundo infrma a CIG-Banca, na seguinte reunión farán propostas e agardan que os sindicatos “sexamos imaxinativos. Que saibamos só hai un xeito de botar 650 persoas da empresa: un ERE. Agardamos pois que digan que clase de medidas queren incluir no mesmo, a CIG no acepta despedimentos e o persoal xa dixo NON ás baixas incentivadas”.

A CIG propuxera o aprazamento da negociación de calquera medida laboral até procurar unha solución ao problema comercial, para evitar transmitir incertaza á clientela, xa que ante a grave situación de desconfianza xerada pola comercialización das participación preferentes, nomeadamente na comarca do Morrazo e Vigo, se están a producir concentracións de clientes a cotío, con insultos e ameazas ao persoal tanto no posto de traballo como no día a día. Esta proposta foi apoiada polo resto da representación, pero a Dirección desestimouna. A CIG-Banca explícase a actitude da dirección, porque xa tiñan remitido un comunicado aos medios de comunicación antes de entrar na reunión. “O disparate non quedou aí. A empresa confundiuse no comunicado (enviou o da 2 reunión?) e falou de medidas de recorte salarial escalonado que non propuxo na mesa negociacidora”, denuncia.