Bunge comeza a derrubar un novo silo a pesar de carecer da autorización municipal

Os traballadores e traballadoras de Bunge Ibérica denunciaron que a empresa comezou na mañá deste venres co derrube do teito do silo 4 de formigón, aínda que carece da autorización municipal pertinente. Segundo explicou Ángel Herrero, delegado da CIG na empresa, cando o persoal acudiu esta mañá ás instalacións da fábrica, atopáronse con maquinaria que estaba procedendo ao derrube do teito do silo 4. Inmediatamente comunicaron á Policía Local de Culleredo este feito co obxecto de que se achegase até o lugar para paralizar a demolición.

Non obstante, e a pesar de que a empresa non conseguiu a autorización municipal para o derrube deste silo, a policía indicou que non podían parar as obras, aínda que procederon a elaborar un informe para trasladarllo ao Concello.

Cabe lembrar que hai uns días o persoal alertou aos bombeiros dun novo incendio no silo, amosando as súas dúbidas a respecto da orixe de dito lume e das intencións da empresa. De completarse finalmente a operación, este converteríase xa no quinto depósito que desaparece da fábrica (dous caeron por pura neglixencia e deixamento da multinacional, mentres que outros dous foron destruídos por decisión da empresa).

Para os traballadores/as de Bunge esta nova actuación da empresa supón unha burla tanto para os propios empregados como para o Concello de Culleredo, o alcalde e a Inspección de Traballo.