CIG-Ourense amosa o seu desprezo ás declaracións de Adolfo Domínguez a prol do despedimento libre

Contra o ataque aos dereitos das traballadoras/es

A comarca de Ourense da CIG emitiu un comunicado no que subliña que "as declaracións feitas por Adolfo Dominguez no Foro Europa, son un insulto a todo os traballadores e traballadoras e poñen de manifesto, unha vez máis, a personaxe cavernícola que se esconde detrás deste empresario".

Engaden desde a CIG-Ourense neste comunicado que "expor a estas alturas o despido libre sen trabas administrativas nen xudiciais, é tentar voltar a época da escravitude e defender unhas relacións laborais que lembran a explotación máis inhumana da historia do capitalismo. Con estas teorías para aumentar a produtividade, esta persoa non tería reparos en utilizar o látigo para conquerir aínda máis sometemento da clase traballadora".

Ataque ao Estado de Benestar

"O seu ataque ao estado de benestar e aos dereitos dos traballadores/as supera todos os feitos deica agora deixando ó descuberto o personaxe, un explotador sen escrúpulos, que se beneficia de enormes cantidades de diñeiro público en subvencións do Estado e da Xunta, e dicer, diñeiro de todos os cidadáns, mentres a maior parte da produción ven de China froito a sobre-explotación a que están sometidos alí os traballadores-as".

Por último, salientan que "as súas declaracións merecen o noso total desprezo e o de todos os demócratas".