Inícianse as mobilizacións en defensa da existencia da Caixa de Aforros

A CIG en Novacaixagalicia ten convocada para o vindeiro día 10 de febreiro a primeira mobilización en defensa do carácter público da Caixa de Aforros fronte a intención do Goberno do PSOE, de privatizar a entidade. Por iso ten convocada unha concentración diante da Delegación do Goberno na Galiza, a partir das 11:15 horas, desprazándose posteriormente para rematar a protesta no Banco de España.

Para a CIG “non cabe agardar a que o goberno central aprobe un decreto discriminatorio que ten coma único obxectivo xustificar a privatización das Caixas”, é por iso que o vindeiro 10 de febreiro as delegadas e delegados do sindicato nacionalista en novacaixagalicai teñen convocada unha concentración diante da Delegación do Goberno na Coruña, desprazándose posteriormente para rematar a protesta no Banco de España.

Unha vez coñecida a intención do goberno central de privatizar as Caixas de Aforros, a CIG entrou en contacto con UGT e CCOO para tratar de unificar posicións e fixar un calendario conxunto para dar resposta a esta nova contra reforma do goberno. Unha unidade truncada ante a negativa de CCOO e os posteriores manifestos dos sindicatos estatais a favor da bancarización de “La Caixa de Pensións” que consideran un exemplo para o todo o sector.

Dende a CIG-novacaixagalicia anuncian que as concentracións previstas son o arranque dunha campaña a favor dunha Caixa de Aforros Galega baixo control público, fronte a intención de centralizar e privatizar o sistema financeiro.