A CIG participa como convidada nas celebracións do 1ºde Maio n’A Habana

Arredor de 600.000 persoas residentes n’A Habana desfilaron pola Praza da Revolución da capital cubana no acto central das celebracións do 1º de Maio de 2009. As conmemoracións deste ano teñen un especial significado por canto se celebra o 50 aniversario do trunfo da revolución en Cuba e o 70 aniversario da fundación da CTC -Central de Traballadores de Cuba.

Ás 8 da mañá púxose en marcha a inmensa columna aberta por unha faixa co lema “combativos, produtivos e eficientes”, seguida de dous grandes cadros transportados por manifestantes. No maior deles, Fidel e Raúl  pintados sobre a bandeira de Cuba e no segundo, algo menor, o logo da CTC.

A marcha estivo presidida polo Xefe do Estado cubano, Raúl Castro; nun palco preferente, numerosos diplomáticos acreditados n’A Habana e moitos dos participantes na Conferencia do Movemento dos Países Non Aliñados celebrada en Cuba nos últimos días de abril; no espazo inmediatamente inferior, un cento de delegacións sindicais –a CIG entre eles– de máis de 50 países e de movementos sociais solidarios con Cuba chegados dos cinco continentes.

Unha única e breve intervención de Salvador Valdés, Secretario Xeral da CTC, destacando o papel fundamental dos traballadores e das traballadoras na construción e consolidación da revolución cubana, na loita polo socialismo e na defensa da soberanía nacional precedeu ao inicio da marcha. Miles e miles de cartaces de feitura artesanal con referencias ao tema central da xornada –unidade, produtividade, eficiencia-, reclamando a liberdade e retorno a Cuba dos cinco heroes presos nas cárceres norteamericanas, saudando a Fidel e Raúl, renovando a promesa “patria ou morte, venceremos”, ... , daban colorido á multitudinaria marcha. Todos os sindicatos nacionais que compoñen a CTC en grupos compactos e coloridos estiveron presentes na impresionante e multitudinaria manifestación que contou tamén cun numerosísimo grupo de xente nova portando faixas nas que, entre outros lemas, se podía ler “estudo, traballo, fusil”, “xamais terán a Cuba”, “os novos non fallarán”.

Recoñecemento do esforzo

Pola noite, nun austero e solemne acto, un seleccionado grupo de traballadores, traballadoras e colectivos laborais, foron condecorados en recoñecemento do esforzo militante e do exemplo vivo e permanente nos seus centro se traballo. O acto estivo presidido polo Vicepresidente do Goberno, José Ramón Machado, contando tamén coa presenza de membros do Goberno, das institucións cubanas, de altos dirixentes do PCC e da CTC. Un grupo moi restrinxido de organizacións sindicais, a CIG entre elas, participaron no acto en calidade de convidadas.