imprimir
Mobilización na sede de Geriatros en Vigo para esixir o desbloqueo do convenio e pola readmisión dos delegados despedidos
As mobilizacións a prol dun convenio digno para os traballadores e traballadoras das residencias privadas da terceira idade retomábanse esta mañá na sede de Geriatros de Vigo. Ás portas do edificio, situado na rúa García Barbón, persoal e delegados/as sindicais desenvolveron unha ruidosa concentración durante unha hora para reclamar á patronal que desbloquee as negociacións e asuma as reivindicacións da parte social.
O lugar elixido para a protesta non foi casual, xa que obedecía tamén á finalidade de denunciar á política de represión que esta empresa en concreto está a pór en práctica cos seus traballadores/as e reclamar á readmisión dunha delegada da CIG no Comité de Geriatros en Laraxe e dun delegado de CCOO no centro de Vilanova de Arousa, aos que a empresa despediu como medida exemplarizante para os seus compañeiros/as e nun burdo intento de evitar lexítimas reivindicacións para o sector.
CIG-Servizos e CCOO xa anunciaron a presentación dun conflito colectivo para desatascar a negociación do convenio autonómico de residencias privadas da terceira idade, pois a patronal segue mantendo unha postura inflexíbel e teima en eliminar do texto galego a cláusula de equiparación coas condicións máis beneficiosas do estatal.
De feito, na mediación do AGA do 20 de abril cumpríronse as peores expectativas e a patronal non aceptou ningunha das propostas da CIG-Servizos e CCOO É máis, só está disposta a negociar sobre a súa plataforma e non admite modificación algunha que supoña máis que un pequeno retoque.
Dende a CIG e CCOO adiantou que as mobilizacións continuarán nos vindeiros días.
