A CIG convoca mobilizacións en Faurecia en apoio dun empregado que foi sancionado por cumprir a gama de traballo da compañía

O cadro de persoal realizará concentracións diante da empresa, no polígono vigués de Valadares, en solidariedade co compañeiro, o que tamén acusan de ir ao baño

A CIG-Metal denuncia que Faurecia-Asientos de Galicia vén de sancionar con 20 días de suspensión de emprego e soldo a un traballador ao que acusa de desabastecer a liña de produción e de ausentarse para ir ao cuarto de baño, cando o único que fixo foi cumprir a propia gama de traballo deseñada pola compañía. En resposta, a central nacionalista convoca concentracións de solidariedade diante das instalacións, no polígono vigués de Valadares coincidindo co cambio de quenda.

Dende a sección sindical da CIG na compañía que fabrica compoñentes para o sector de automóbil sosteñen que o afectado cumpre coa gama de traballo (plan de traballo) establecida pola empresa, o que provocou precisamente ocos na liña de produción, polo que entenden que debera ser revisada.

En resposta, convocan concentracións solidarias diante da compañía situada no polígono vigués de Valadares coincidindo co cambio de quenda. A primeira terá lugar este martes día 5 de xuño entre as 13.30 e as 14.30 horas.