FCC despide a dúas traballadoras por negárense a traballar en domingo nas condicións impostas pola empresa

Fomento de Construcciones y Contratas, concesionaria da limpeza viaria do Barco de Valdeorras, despediu a dúas empregadas despois de que rexeitasen traballar en domingo baixo as condicións impostas pola empresa e tampouco accedesen a custear dos seus petos a obtención do carné de camión . Dende a CIG da localidade ourensá lembran que a categoría profesional das operarias é a de limpadora e posúen unha antigüidade de máis de 15 anos neste servizo municipal xa que son persoal subrogado ás distintas concesións que o Concello levou a cabo neste tempo.

Nas cartas de despedimento, que recibiron despois de negarse a traballar os domingos “case de balde”, a propia compañía recoñece a improcedencia dos mesmos e fixa indemnizacións que en conxunto superan os 60.000 euros. Isto leva á Unión Local de Valdeorras a preguntarse como é posíbel que prefiran gastar estes cartos “e non adicar nin un só céntimo á formación”, partida na que entraría a obtención dos distintos carnés de conducir.

Dende o sindicato nacionalista lembran que para modificar as condicións de traballo hai que chegar a un acordo cos afectados/as e que para adaptar traballadores/as a novas funcións é preciso contar coa formación axeitada, que debe correr a cargo da empresa. Por último, sosteñen que o número de empregados/as do servizo de limpeza viaria do Barco de Valdeorras é insuficiente, “polo que o normal sería facer novos contratos, non pretender obter máis beneficios aforrando en salarios”.