Cinco furgóns de antidisturbios impiden a realización da asemblea dos parados cos traballadores do estaleiro de Freire

Rodearon aos vinte traballadores da asemblea de parado e afastáronnos da porta

A asemblea de parados do naval repartía a primeira hora da mañá follas informativas aos compañeiros do estaleiro de Freire para dar a coñecer a súa situación e a problemática do sector na cuestión da contratación, facendo un chamamento para que saíran tomar o bocadillo con eles ás 10.30. De novo as portas pecháronse para a asemblea de parados e unha presenza e presión policial desproporcionada impediu que esta asemblea puidera ter lugar.

Desde as dez da mañá cinco furgóns de antidisturbios rodeaban ao persoal da asemblea de parados do naval que nunha xornada máis se achegaba até outro estaleiro para trasladar aos seus compañeiros á situación que están a vivir no desemprego, pola falta de regulación de contratación no sector, que leva a que os empresarios estean a subcontratar ilegalmente man de obra barata.

Identificacións e acoso

Asi, os antidisturbios identificaban ás xentes da asemblea de parados do naval, e mesmo aos medios de comunicación presentes no acto para cubrir a información. Trasladaron a estas 20 persoas lonxe da porta do estaleiro para que non se pudieran comunicar cos compañeiros que estaban no interior de Freire, evitando deste xeito que se realizara a asemblea como pasou nesta semana en Barreras.

"Queren cortar a solidariedade do sector"

Desde a asemblea de parados do naval lamentaban a actitude despótica das forzas policiais, que o que "queren é cortar a solidariedade do sector, que non podamos falar cos nosos compañeiros, pero non van poder evitar que continuemos mobilizándonos e falando cos traballadores do sector.

Pouco despois das once da mañá e diante desta situación, os traballadores da asemblea de parados decidiron dar por rematada esta mobilización, e trasladáronse.

Máis imaxes e video

Na galería de imaxes da nosa web, ou nesta ligazón, podedes atopar máis imaxes da xornada de hoxe. Tamén podedes visualizar nesta ligazón unha peza audiovisual sobre esta nova xornada de reivindicación e loita da asemblea de parados do naval.