A CIG de Vigo mobilizarase o 10 de marzo en defensa das pensións, do emprego e os salarios, ás 20 desde Vía Norte

O 5 de marzo tivo lugar unha rolda de prensa convocada para presentar a campaña do 10 de marzo, en defensa das pensións e para a posta en andamento de políticas alternativas fronte a crise, e contra a reforma laboral e o aumento da idade da xubilación, e a manifestación do 10 de marzo, Dia da Clase Obreira, que percorrerá Vigo nesa data ás 20 da tarde. Participaron o secretario comarcal da CIG de Vigo, Serafín Otero, e unha representación da Executiva Comarcal.

Serafín Otero, secretario comarcal da CIG de Vigo, comezou a súa intervención nesta comparecencia diante dos medios de comunicación anunciando a mobilización que percorrerá a cidade de Vigo o 10 de marzo, ás 20, desde Vía Norte "contra o paquete de medidas do goberno que supoñen recortes moi graves para a clase traballadora", e criticou o papel que están a xogar as centrais sindicais estatais, CCOO e UGT, coas súas mobilizacións que "són só un lavado de cara, porque non entran en profundidade sobre o que supón a reforma das pensións".

Aumento da idade de xubilación

Tamén criticou a proposta de aumento da idade da xubilación xa que "suporía máis paro e hai situacións de traballo penosas nas que xa é dificíl que un traballador ou traballadora chegue aos 65".

Nese sentido, Otero indicou que "só pode ter unha explicación posíbel todo o que pretenden facer coa reforma das pensións: queren fomentar a privatización das pensións e levalas da man do sector financeiro".

Empobrecemento dos/as pensionistas

O secretario comarcal da CIG de Vigo denunciou o que se está a facer por detrás no Pacto de Toledo, que é modificar os anos para o cálculo das pensións, que pasarían de ser de 15 a 25 anos, polo que se retrocedería no calculo das pensións e empobrecerianse moito máis os e as pensionistas. Galiza é a segunda comunidade por abaixo na media das pensións, cunha media de 704 euros, o que supón unha situación de pobreza real "á que ninguén busca solucións".

O recorte do gasto público e da asistencia social que se está a dar tamén vai repercutir na clase traballadora, asi como o anuncio de reforma laboral, coa que pretenden abaratar o despedimento e reducir as indemnizacións, e facilitar o acceso de ETT's, e precarizar aínda máis o mercado laboral.

Acordo da negociación colectiva

O acordo de negociación colectiva asinado en Madrid pola patronal e CCOO e UGT foi outra das cuestións criticadas nesta rolda, xa que "nos pon topes nos próximos tres anos e mesmo existe unha cláusula de descolgue para a patronal, asi que non teñen nin porque asegurar eses mínimos incrementos, polo que volveremos sufrir perda de poder adquisitivo".

Necesidade da mobilización

"Estamos vivindo unha situación de perda de melloras sociais e se cedemos as traballadoras e traballadores alegando unha situación de crise, que pode ser real, mais fronte a que non hai medidas do Goberno, podemos estar diante dunha situación moi grave. Temos que mobilizarnos e sair ás rúas como se fixo noutros tempos, porque todo aquilo que se foi cedendo non se recuperou", engadiu.

Na cidade de Vigo o paro chegou xa aos 36.000 traballadoras e traballadores, e no conxunto do sur da provincia son xa 60.000 as persoas, que partindo da base de que na súa maioría son mulleres e mozas/os, aínda teñen máis difícil unha saída para a súa situación laboral.

Os sectores que máis están a sufrir esta crise son Servizos e Construción, mais tamén a automoción e o naval están pasando unha situación difícil no emprego.

Na comarca de Vigo hai moitos conflitos abertos como o de Alfageme, Adegas Galegas, Tradisa, Orbi, Agridesa, Delio, Antolín Asientos, Cruz Vermella, os despedidos da limpeza no  Alcampo, Levantins, o peche dalgunha entidadde financeira de Citifin, asi como a ameaza de deslocalización que sofre a empresa de telemarkéting Bosch, entre moitos outros.

Tamén se salientou nesta rolda a folga no sector naval, asi como a loita da asemblea de parados do naval co seu acampamento fronte á Xunta en Vigo.

Criticas á Xunta

Nesta situación tan complicada "Traballo non dá sinais de vida, dá a sensación de que están desaparecidos do mapa", criticou e insistiu na necesidade de "mobilizarnos o dia 10, para qie sexan os máis ricos os que teñan que aportar máis, por unha defensa do emprego maior e de calidade, para que se incremente o gasto social, para que haxa outra política de rendas e por unha economia galega, pública e sostíbel".

Por último realizou un chamamento á manifestación, e anunciou que "terán lugar moitas máis mobilizacións, polo que tampouco é descartabel unha folga xeral, porque se dan todo tipo de motivos".