Os traballadores/as de Hermanos Rodríguez protestan diante da casa do propietario da empresa para reclamar sete meses de salario

Previamente percorreron as rúas de Vigo nunha manifestación que partiu do mercado de Teis

Os traballadores/as do Grupo Hermanos Rodríguez Gómez, empresa dedicada á fabricación de maquinaria industrial radicada en Vigo dende 1960, desenvolveron este luns unha protesta diante da casa do propietario para reclamar o pagamento dos salarios pendentes. Previamente percorreron as rúas de Vigo nunha manifestación que partiu do mercado de Teis ás 11.00 horas.

Dende o comité de empresa explican que a protesta tiña como obxectivo denunciar a crítica situación na que se atopa empresa, “xa que levamos sete meses sen cobrar e estamos abocados ao peche”. A compañía conta na actualidade cun cadro de persoal formado por 60 persoas.

O empresario, ademais de non abonar os salarios, descapitalizou a empresa, débelle cartos a Facenda, Seguridade Social, provedores e empresas auxiliares. “Ao mesmo tempo, vén de contratar un restruturador (mercenario) para despedir a todo o cadro de persoal”, critican.

Finalmente, anuncian que seguirán a mobilizarse en busca dunha solución ao conflito laboral.