Desconvocada a folga de 15 días na Vidreira do Atlántico, por mor do peche patronal ilegal

A folga de 15 días na Vidreira do Atlántico ficou desconvocada o domingo 5 de xullo por parte dos traballadores/as, ao considerar que a decisión da empresa de proceder ao peche de dúas liñas de produción constitúe un pechamento patronal ilegal, que tan só procura frustrar os obxectivos dos folguistas, así como pola reiterada “limitación e violación patronal do exercicio do dereito á folga e á liberdade sindical”.

O domingo 5 de xullo, a quenda das 6:00 horas na Vidreira do Atlántico volvía ao traballo, desconvocando a folga de 15 días iniciada o pasado 26 de xuño. A decisión chegaba logo da decisión da patronal de pechar dúas das tres liñas de produción, sen achegar garantías de que se ía retomar a actividade tras o paro.

Dende a CIG xa se tiña advertido en varias ocasións á dirección que se a resposta á folga consistía nun “pechamento patronal ilegal”, o persoal veríase na obriga de desconvocar a medida de presión para evitar os prexuízo que a actitude da dirección podería causar “ao corazón da fábrica: o forno”.

Neste senso, o responsábel da CIG de Verín e voceiro do Comité de Folga, Anxo García Torres, explica que os procedementos técnicos de BA (multinacional propietaria da planta de Xinzo de A Limia) determinan que non se poden producir alteracións bruscas no forma da fábrica, xa que as estas poderían derivar en riscos para a seguridade dos bens, das instalacións e das persoas. “Sobre este fundamento pactáronse os servizos de seguranza e mantemento de todas as anteriores xornadas de folga, e, non obstante, agora a dirección da empresa mantén, incongruentemente, que o que valía para antes non é válido para agora”, apunta García Torres.

Coa decisión, a empresa obvia o procedemento técnico deseñado por eles mesmos, cuxo obxecto é regular as situacións de absentismo prolongado e imprevisto, como as folgas. “É evidente, pois, que a dirección procurou, coa imposición do pechamento de dúas das tres liñas de produción, xerar unha situación de crise na fábrica e nas relacións laborais, dirixida a frustrar os obxectivos da folga e, mesmo, a avalar accións futuras contra as relacións laborais”, critica o voceiro do Comité de Folga.

Vulneración do dereito á folga

Ante a actitude amosa pola dirección, cualificada polo persoal de “mala fe e contra o dereito á folga”, os traballadores e traballadoras acordaron tamén demandar novamente á empresa polo peche patronal ilegal, así como solicitar o resarcimento dos danos causados ao persoal en folga, obrigados a ter que desconvocar a medida de presión.

“Hai un dado que é incontestábel e que revela o até agora dito. A Dirección empresarial, tan preocupada ela pola actitude dos folguistas e polas perdas da medida de presión, non obstante, co pechamento de dúas liñas de produción impediu de facto o traballo a todos aqueles que podían desexar exercer ese dereito. Cómo é posíbel que se acuse aos folguistas das enormes perdas causadas pola medida de presión e, porén, se impoña un pechamento de dúas liñas de produción que, ademais de violar o dereito de folga, impide tamén o dereito ao traballo?”, pregúntase Anxo García.

A venda da Vidreira por “3 euros”

Para os traballadores e traballadoras, a reunión mantida o pasado 1 de xullo, a instancias do Consello Galego de Relacións Laborais, para tentar desbloquear o conflito, non fixo máis que confirmar as intencións do Grupo BA, de provocar unha situación de crise que afectase aos medios de produción e que lle permita tomar decisións futuras contra as relacións laborais.

A este respecto dende o Comité de Folga lémbrase que o propio presidente do Grupo BA, tras anunciar na citada reunión en máis dunha ducia de ocasións o inminente peche da empresa de Xinzo, chegou, “no seu ton habitual de falta de respecto e burla continúa ás institucións deste País”, a ofrecer a venda da Vidreira á Xunta de Galiza por un prezo de “3 euros”.

Exemplo de unidade

Así as cousas, os convocantes da folga, acordaron tamén facer reserva expresa do dereito a propor novamente, e no momento que se considere oportuno e axeitado, os obxectivos da convocatoria de folga.

Así mesmo, dende o Comité de Folga quíxose felicitar a todos os traballadores e traballadoras que dende o 26 de xuño estiveron dando exemplo de unidade e dignidade, “que os levará a recuperar o que lles pertence”.

Revogamento de delegados/as

Noutra orde de cousas, o presidente do Comité de Empresa da Vidreira do Atlántico, Plácido Valencia, remitiu un escrito coas copias de 76 sinaturas de traballadores/as da fábrica de Xinzo á Delegación Territorial da Xunta de Galiza en Ourense, solicitando o revogamento dos delegados de persoal de CCOO e CSIF membros do Comité.

Por este motivo, o 13 de xullo ficou convocada unha reunión da representación dos traballadores/as para tratar este asunto, e no seu caso, implementar os trámites axeitados para dar inicio ao proceso de revogamento.

A decisión tomouse a partir da promoción dun referendo o pasado 25 de xuño, convocado por ambos delegados de costas ao conxunto dos traballadores e suplantando as competencias dos representantes legais dos mesmos; a formulación de denuncias falsas contra as persoas que exercen o seu dereito á folga; así como polo desprezo e contravención permanente dos acordos adoptados polo Comité.

DESCONVOCATORIA FOLGA-1.pdf
REVOGAMENTO DELEGADOS-1.pdf