Portada
Temas
Confederal
Sectores
Entrevistas
Opinion
Multimedia
Contacta
 
Vigo, 6/9/2012
Chuza Menéame del.icio.us
compartir

A Executiva Confederal da CIG acorda adiar a data da folga xeral para favorecer unha convocatoria conxunta con CCOO e UGT

A decisión deberá ser ratificada polo Secretariado Confederal extraordinario que se celebra o luns
A Executiva Confederal da CIG acordou hoxe adiar a data dunha nova folga xeral -prevista inicialmente para o 26 de setembro- co obxectivo de lograr unha convocatoria conxunta con CCOO e UGT. A decisión está pendente de ratificación polo Secretariado Confederal extraordinario que se celebra o luns en Santiago de Compostela, organismo que integra as distintas comarcas e federacións.

O secretario xeral da central nacionalista explicou que na xuntanza valorouse a posibilidade de lanzar a convocatoria en solitario, “mais entendiamos que esta decisión podería ter os seus perigos”. Neste senso, Suso Seixo indicou que despois das masivas mobilizacións conxuntas do pasado 19 de xullo “hai moitas expectativas creadas e se imos nós en solitario pode levar a que a resposta non sexa tan contundente como merece o actual contexto económico e social”.

Deste xeito, a Executiva Confederal da CIG aposta por seguir a traballar con CCOO e UGT “para que se convenzan da necesidade dunha folga xeral”. En canto á data da convocatoria, Seixo indicou que a barallada inicialmente -0 26 de setembro, coincidindo co paro xeral convocado en Euskal Herría pola maioría sindical vasca- “parecíanos axeitada porque chegaría antes da aprobación dos Orzamentos e das eleccións autonómicas, pero sempre no caso de que fose unha convocatoria conxunta das tres centrais”.

Do contrario -explica o máximo resposábel da CIG- o Partido Popular podería intentar desprestixiar a convocatoria utilizando o argumento de que se fai para favorecer os intereses de determinada forza política do campo do nacionalismo galego.

Finalmente, adiantou que a decisión que se tome no Secretariado Confederal do luns será comunicada ao día seguinte na asemblea de delegados/as que tamén terá lugar en Santiago.

cig.prensa@galizacig.com