320 docentes participan en Compostela nas xornadas Laicidade e Cidadanía, organizadas pola CIG-Ensino e a AS-PG

As Xornadas Laicidade e Cidadanía, celebradas os días 7 e 8 de novembro, no IES Rosalía de Castro, en Santiago de Compostela, reúnen a 320 profesores e profesoras para abordar a problemática das relacións Igrexa- Estado e Laicidade. Durante as xornadas, organizadas pola CIG-ENSINO e a AS-PG, interviñeron personalidades chegadas de distintos puntos do Estado e Portugal para amosar a súa visión sobre esta cuestión.

Tendo en conta o debate aberto, o curso pasado, a raíz do conflito da presenza da relixión no Bacharelato, en prexuízo da carga horaria de materias fundamentais, a CIG-Ensino e a AS-PG organizaron as xornadas coa finalidade de abordar do xeito máis amplo e contextualizado, a problemática das relacións Igrexa-Estado e Laicidade.

Nestas Xornadas, interveñen distintos persoeiros , chegados de varias partes do Estado e de Portugal, que ofrecen a súa visión sobre a laicidade: problemas actuais, o marco xurídico e social, a crise da laicidade, o asociacionismo pola súa loita, a relación co cristianismo, etc.

As xornadas deron comezo o venres 7 ce novembro, ás 17.00 horas,  coa Mesa redonda: Laicidade hoxe: Marco xurídico e social, a cargo de Eva Mouriño (Profesora de Filosofía) e Cristina Alonso (xurista). A seguir, ás 18.30, Anxo Louzao (Secretario Nacional da CIG-Ensino) e Ana Alonso (Profesora de Filosofía) disertan sobre  a Laicidade e Ensino: Problemas actuais. Para finalizar esta primeira xornada, a Sociedade Cultural Medulio (Ferrol) encárgase da representación dun fragmento do Divino Sainete de Curros Enríquez.

O sábado, 8 de novembro, ás 10.00 horas, Fernando Catroga (Catedrático da Faculdade de Letras de Coimbra) ofrecerá a conferencia, Crise da Laicidade: O mosaico europeo das relacións entre Deus e César e, ás 11.30, Raimon Goberna (Fundación Francisco Ferrer i Guardia, Catalunya) exporá o tema, O asociacionismo na loita polo laicismo.  Ás 12:30, a Mesa redonda na que participarán Pilar Pena Búa (Teóloga) e Norma Rodríguez (Asociación ARELA) versará sobre o tema Cristianismo e laicidade.

A xornada do sábado pola tarde ofrecerá 2 conferencias: ás 17.00, Marcial Gondar Portasny (Universidade de Santiago de Compostela) desenvolverá o tema, A gramática da sedución. Un novo estilo de comunicación para o cambio social e ás 19.30, Pedro Martínez Montávez (Universidade Autónoma de Madrid) porá fin ás Xornadas coa 2ª conferencia da tarde, Mundo árabe, democracia e laicismo.