Nélida Pisco volve ao seu traballo como condutora dos Autobuses de Calo

Nélida Pisco, que fora despedida de Hedegasa (Autobuses de Calo) e que posteriormente gañara no xulgado o dereito a ser readmitida, logo de declararse nulo o seu despedimento, cumpriu o pasado xoves un mes traballando de novo. A pesar de que polo momento a situación non é ideal ao non existir unha relación formalizada coa empresa e que quedan asuntos que aclarar sobre como debe realizar a súa ruta, desde a CIG valórase como moi positiva a súa reincorporación logo de máis de dous anos de loita polos seus dereitos e de case un ano de ser despedida.

O sindicato considera que a actitude e a resistencia desta traballadora constitúen un exemplo para quen non quere renunciar a un traballo polo feito de ser nai pese aos intentos a presións da súa empresa para que abandone. Neste caso tiveron que pasar varias sentencias e moitas concentracións e accións sindicais para que a empresa entendera que o que tiña que facer era cumprir a lei e permitir que a traballadora mantivera o seu posto de traballo.

Recentemente este exemplo de dignidade foi recoñecido polas traballadoras do transporte de viaxeiros da comarca de Compostela que na súa cea anual lle fixeron entrega dun ramo e dunha placa á “condutora coraxe”. Este é un detalle que se valora moito sobre todo despois da campaña de desprestixio que a empresa mantivo hai meses entre os traballadores e traballadoras do sector.

Desde a CIG agaárdase que, a partir de agora, co diálogo se podan solucionar os problemas que podan xurdir tras a súa reincorporación e que Nélida poda seguir desenvolvendo o seu traballo sen impedimentos ao tempo que goza da súa maternidade. Así mesmo a central desexa que o caso desta traballadora sirva para que situacións coma esta non se repitan.