Éxito da xornada organizada pola CIG-Saúde de Lugo a respecto do proceso de privatización da sanidade galega

Participaron profesionais do sector e representantes das asociacións de veciños/as da cidade

A CIG-Saúde de Lugo organizou unha xornada o pasado 3 de marzo baixo o título “Sanidade Pública. Novas políticas privatizadoras: olladas dende Lugo”, que contou coa participación de profesionais do sector así como membros das asociacións de veciños/as, que achegaron unha análise sobre as repercusións que vai ter para a cidadanía o proceso privatizador iniciado polo goberno galego.

Durante a xornada cuestionouse a política sanitaria practicada dende o Goberno da xunta de Galiza, dirixido claramente cara a modelos de financiamento privado da Sanidade Pública (modelos PFI), seguindo o exemplo que comunidades como Madrid ou Valencia tomaron dos ingleses, “cando xa está demostrado que empeoran a calidade asistencial e que hai outras maneiras de facer que unha asistencia sanitaria de calidade sexa posible”.

O contexto político actual e como pode chegar a repercutir no hospital novo de Lugo é a principal preocupación da CIG-Saúde na provincia, polo que se acordou organizar esta xornada co obxecto de avaliar e dar a coñecer as consecuencias de levar adiante políticas privatizadoras no servizo público de saúde.

Na mesma participaron Manolo Moreira, médico responsábel da Agrupación Médica da CIG-Saúde (AGM) e Paco Vizoso, médico responsábel da Agm e xefe do servizo de medicina preventiva do CHOP, quen se encargaron de explicar os modelos PFI e os resultados das experiencias galegas a este respecto. Pola súa banda, a secretaria comarcal da Federación de Saúde, Carme Aira e o radiólogo do Hospital Xeral, Roberto Rei, abordaron a situación actual da sanidade en Lugo; mentres que Valentín Arias achegou unha visión desta cuestión dende as asociacións de veciños/as.

Despois das intervencións tivo lugar un coloquio, no cal os asistentes preguntaron aos poñentes sobre as súas inquedanzas sobre a privatización da sanidade, as motivacións, a repercusión sobre a poboación.. etc..

Documentos

CIG-Privatizacion-da-Sanidade.pdf
Hospital_novo.pdf