Continúan as protestas dos traballadores de Valoriza contra o despedimento de doce traballadores, desta volta na peaxe de Rande

Os traballadores e traballadoras de Valoriza Conservación de Infraestructuras, filial de Sacyr que se encarga do mantemento da AP-9 e a A-57, decidiron volver ás mobilizacións contra o despedimento de doce traballadores nesta empresa, e o xoves 7 de maio levaron as súas protestas ao lugar no que traballan, a peaxe de Rande, onde pagaron con moedas de céntimos, colapsando esta vía. O venres retomarán estas accións.

En torno ás 19 horas, máis de cincuenta empregados decidiron pagar os 2,95 euros en moedas dun céntimo. O resultado foi o de máis de dous quilómetros de retencións en sentido Vigo e algo menos cara a capital do Lérez pola intervención de Tráfico, que abriu as barreiras da peaxe.

Xaquín Agulla, secretario comarcal da CIG-Construción en Pontevedra, en rolda de prensa, sinalaba que «tomamos esta decisión despois de romper onte as negociacións coa empresa. Agora faremos escoitar as nosas protestas doutro xeito».

Novas accións e xuízo

O venres volverán repetir estas accións, a partir das seis e media, para denunciar a actitude da empresa, xa que nun acto de mediación, con presenza da Inspección de Traballo, a propia empresa rebaixou a súa proposta de indemnización por despido improcedente, e como sinalaba Agulla, "facer agora unha folga, cos servizos mínimos abusivos impostos pola Subdelegación do Goberno non resulta efectiva, e queremos que se escoite a nosa voz". Na terceira semana de maio terá lugar o xuízo no que se reclama a readmisión destes doce traballadores, e que se recoñeza a improcedencia deste despedimento.