Portada
Temas
Confederal
Sectores
Entrevistas
Opinion
Multimedia
Contacta
 
A Coruña, 8/6/2009
Chuza Menéame del.icio.us
compartir
Os traballadores/as de SEAGA despregaron unha faixa e cartaces no interior do edificio administrativo da Xunta en A Coruña reclamando unha solución a súa precaria situación laboral.

Traballadores/as de SEAGA concéntranse nas delegacións provinciais do Medio Rural

Reclaman a readmisión do persoal despedido e unha reunión coa administración para coñecer o futuro da empresa pública
Traballadores e traballadoras de SEAGA levaron a cabo novas accións de protesta nas delegacións do Medio Rural previas á folga e manifestación convocadas o vindeiro xoves 11 de xuño. O persoal quere amosar deste xeito o rexeitamento ao despedimento de 150 compañeiros/as nos últimos meses e reclamar solucións a situación de precariedade que padecen así como coñecer cal vai ser o futuro da empresa pública.

As mobilizacións, que contan co apoio da CIG e CUT, foron acordadas polas asembleas de traballadores/as de todo o País e os Comités de Empresa para desenvolvérense nas distintas delegacións da Xunta nas catro provincias. As accións preceden á convocatoria de folga nacional o 11 de xuño, xornada na que tamén se desenvolverá unha manifestación en Compostela a partir das 11:00 horas.

En Pontevedra, Lugo e Ourense, os/as traballadores/as concentráronse diante dos edificios provinciais da Consellaría do Medio Rural, mentres que en A Coruña o persoal mantivo un pequeno peche dunha media hora no interior das instalacións administrativas da rúa Monelos.

Dende os comités reclámase aos responsábeis da Empresa Pública de Servicios Agrarios Galegos e da administración o mantemento dunha xuntanza na que aclarar cal vai ser o futuro e os obxectivos da empresa e proceder a readmisión dos compañeiros/as despedidos.

Os traballadores/as denuncian as pésimas condicións laborais que están a padecer, cobrando “salarios de miseria, tendo que sufrir o incumprimento reiterado dos compromisos acadados e a arbitrariedade para as novas contratacións, o que pon en perigo numerosos postos de traballo”.

Dende marzo xa foron despedidas 150 persoas, a pesar do acordo acadado cos anteriores responsábeis de SEAGA, e denúnciase que se está a prescindir do persoal máis “molesto” e con máis experiencia, polo que xa teñen advertido de que “non nos sorprendería que se producise unha catástrofe”.

cig.prensa@galizacig.com