Continúan as mobilizacións contra o peche do hospital da Cruz Vermella en Vigo

Cortes de tránsito en Beiramar, concentracións e moito ruido para chamar á atención do que está a acontecer no hospital da Cruz Vermella de Vigo, iso é o que están a facer as traballadoras e traballadores deste hospital, asi como as centrais sindicais. O 8 de febreiro tivo lugar a primeira reunión sobre o ERE de extinción dos 70 contratos deste hospital e despois de tres horas de reunión non se chegou a ningún acordo, mentres se está a desmantelar pola via dos feitos este hospital co traslado dos pacientes a outros hospitais de fóra de Vigo, co transtorno para a súa saúde e os problemas que supón isto para as súas familias.

O persoal da Cruz Vermella concentrouse o venres 5 de febreiro diante dun hotel da cidade de Vigo onde o Presidente da Xunta Alberto Núñez  Feijoo participaba nun acto sobre a fusión das caixas, para protestar polo peche do centro sanitario e a retirada de axudas por parte do goberno privatizador do PP.

Na concentración participou un número importande de delegados e delegadas da CIG-Saúde en apoio das traballadoras e traballadores.

Deixan sen atención á cidadanía

As traballadoras e traballadores do hospital da Cruz Vermella de Vigo aseguran que a institución vai pechar este centro sanitario en Vigo, deixando a 70 persoas na rúa, primando os resultados económicos sobre a atención ao cidadán.

O ano pasado enviáronse a Madrid 154.000 euros destinados a un fondo de cooperación, cantidade que axudaría a sufragar as perdas económicas que alegan.

De momento xa trasladaron a 14 enfermos a outros centros, quedando 56 que en canto sexan trasladados se porá o candado definitivo ao centro.

Os traslados e as súas consecuencias

A dirección do centro ten a intención de trasladar aos enfermos a centros de Oviedo, Lugo, Marín ou Pontevedra co conseguinte trastorno para familiares e empeoramento da saúde para os enfermos.

Desconfianza das contas

A CIG-Saúde desconfía coas contas, todos os anos Cruz Vermella enviou a Madrid parte dos fondos obtidos en Vigo, onde a vía de ingresos principal é o concerto co Sergas.

Concentración diante da reunión con Cruz Roja de Madrid

O 8 de febreiro o persoal manifestouse diante do centro a partir da 14:30h en protesta polo peche.

Pola tarde o comité sindical reuniuse cos representantes da institución para saber os plans do futuro mais inmediato e os puntos da negociación sobre o conflito.

Antonio Iglesias, secretario comarcal da CIG-Saúde, salientou que o hospital da Cruz Vermella supón un alivio para a carga de traballo que teñen as unidades de agudos do resto de hospitais da cidade.

Máis mobilizacións

As traballadoras e traballadores recollerán sinaturas contra este peche o xoves en Príncipe, Calvario e Travesas, o venres 12 de febreiro concentraranse diante da delegación da Xunta en Vigo, e xa teñen previsto mobilizarse na terceira semana de febreiro en Compostela.

No plano político, pedirán un pleno extraordinario no Concello de Vigo e falarán cos partidos para que se aborde no Parlamento galego.