Publicada a preprogramación de cursos e accións formativas 2010-2011

A secretaría confederal de Formación para o Emprego da CIG informa da publicación da preprogramación 2010-2011 de formación sectorial e intersectorial para traballadores en activo de FORGA. Con esta programación, esta secretaría enceta un novo sistema de xestión de recursos, coa constitución e posta en marcha de dous tipos de Comisións de Formación. Unha nacional e outras comarcais, integradas por todos os axentes implicados no proceso formativo: secretarios/as comarcais de Formación das federacións, secretarios de unións locais e estrutura da FORGA.

Os obxectivos deste novo sistema regrado de xestión dos recursos e das accións formativas ten que ver co intento da secretaría confederal de Formación para o Emprego de facer partícipes, nos procesos de programación da formación, planificación da execución formativa e avaliación dos resultados, a todos os suxeitos que teñen algo que aportar nesta materia, tanto aos responsábeis da estrutura sindical, como aos propios traballadores e traballadoras que, ao cabo, son os receptores das accións formativas.

Na actualidade, logo de consensuar e acordar nas distintas comisións comarcais da Acción Formativa, entre comarcas, federacións, unións locais e FORGA, as solicitudes de cursos a presentar perante a consellaría de Traballo (Preprogramación), iníciase o proceso de difusión da programación solicitada, así como de planificación da súa execución por medio das comisións comarcais da acción formativa.

Trátase, xa que logo, de promover que a decisión dos destinatarios e destinatarias da formación, as traballadoras e traballadores, se teña en conta nas distintas fases do proceso de programación e execución da formación.

REVISTA INFORMACION CURSOS 2010-2011.pdf
Teleformacion GALIZA.pdf