A Sección Sindical da CIG en Santa Bárbara vén de manifestar o seu máis enérxico rexeitamento ao anuncio da Dirección da Empresa de pechar a Fábrica de armas da Coruña. Dende a Sección Sindical critícase que o grupo General Dynamics non teña cumprido cos seus compromisos de inversións tecnolóxicas e achega de carga de traballo que adquiriu no momento da súa privatización, “como o demostran as Contas de Resultados Anuais, nas cales queda patente a dependencia case absoluta dos pedidos do Ministerio de Defensa”.

A CIG-Servizos vén de expresar o seu rexeitamento ao convenio do sector de limpeza de edificios e locais da Coruña asinado por CCOO e UGT, que supón aceitar un acordo que contempla condicións salariais mesmo inferiores á peor das propostas presentadas con anterioridade pola patronal e que estas mesmas centrais sindicais se negaron a asinar, no seu momento, chegando a convocar mobilizacións para demandar melloras.

Ao pouco de levantar o peche itinerante que as organizacións sindicais da saúde están a realizar en contra dos recortes orzamentarios para a prestación sanitaria e a rebaixa salarial, a Comisión de Centro do CHUAC emitía un comunicado para dar a coñecer a situación de “extrema gravidade” que sofren os doentes ingresados/as do Servizo de Urxencias do hospital da Coruña.

Os traballadores de Estruturas y Obras de Galicia (ESOGA) denunciaron publicamente este venres a situación de total indefensión na que se atopan tras a “desaparición” do administración único da empresa, sen comunicarlles o peche da mesma, sen entregarlle as cartas de despedimento e debéndolle os salarios dos dous últimos meses.

O Comité de Albada (empresa concesionaria da planta de tratamento de residuos de Nostián) formulou denuncia este mércores diante da Policía Autonómica pola comisión dun posíbel delito contra o medio ambiente, logo de que a pasada fin de semana se producira un verquido incontrolado de lixiviados directamente ao mar, tras desbordarse unha das balsas das instalacións.

Centos de traballadores e traballadoras de Extel (A Coruña) están secundando este martes unha xornada de paros de unha hora (por quenda de traballo) e manifestacións dende as instalacións da empresa até as oficinas de Adecco (grupo ao que pertence) para esixir a readmisión do persoal despedido, demandar que se manteña o nivel de emprego e denunciar a política do medo que pretende impor a multinacional.

As asembleas de desempregados/as da CIG en Ferrol e A Coruña continuaron o mércores co calendario de mobilizacións para esixir un cambio nas políticas económicas dos gobernos español e galego que poñan freo á sangría do paro. No caso da Coruña realizaron unha concentración ás portas dunha oficina do Inem, mentres que en Ferrol levaron a cabo unha acción de protesta diante do supermercado DIA.