As organización sindicais teñen convocada folga parcial este mércores 28 de decembro no Centro Comercial Catro Camiños da Coruña contra as pretensións das grandes empresas de atrasar o horario de peche das 21 ás 22 horas. Precisamente, será nesta hora extraordinaria que se quere impor ao persoal cando teña lugar o paro laboral.

Delegados e delegadas da CIG desenvolveron esta mañá unha protesta no supermercado que Gadis ten na Praza de Lugo da Coruña en contra da persecución e acoso que a empresa está a practicar contra un membro do Comité provincial e afiliado á central nacionalista. A empresa de distribución vén de impor unha sanción por falta moi grave a este delegado por negarse a realizar a descarga dun camión estacionado no medio da rúa pola que circulaban os vehículos.

O Xulgado do Social número 3 da Coruña vén de ditar sentenza pola que condena a Mercadona a abonar a prima por obxectivos de 3.175 euros que a empresa denegou a unha traballadora como represalia por integrar a candidatura da CIG para o Comité provincial. Así mesmo, o xulgado declara a “nulidade radical” da conduta vulneradora da liberdade sindical da empregada e ordena o “cese inmediato” do comportamento antisindical da empresa.

Os traballadores de Valoriza Auga da Coruña están secundando estes venres a segunda xornada de folga en contra da paralización da negociación do novo convenio e contra os incumprimentos por parte da empresa da normativa laboral e das condicións técnicas recollidas na contrata con Emalcsa.

Diante das noticias a respecto da convocatoria trasladada por Emalcsa aos responsábeis de Valoriza Auga para tratar o conflito laboral, os traballadores da empresa de limpeza de sumidoiros solicitan da xestora municipal de augas que tamén dea resposta á súa solicitude e manteña unha xuntanza coa parte social. O persoal volve reclamar á convocatoria da reunión solicitada hai máis de quince días co Director Xerente de Emalcsa e co Alcalde da Coruña, e que polo de agora aínda non recibiron contestación.

O Comité de ThyssenKrupp Elevadores, empresa dedicada á instalación e mantemento de ascensores e escaleiras mecánicas, ten convocada unha concentración para o luns 7 de novembro, ás 19:15 horas, diante das instalacións que a compañía ten na Coruña. Coa protesta, o Comité quere denunciar publicamente a situación de acoso laboral á que se vén sometidos tanto os/as traballadores/as como a representación do persoal.

Os traballadores de Valoriza Auga que se encarga da limpeza da rede de sumidoiros da Coruña secundan este mércores a primeira xornada de folga en contra da paralización da negociación do novo convenio e contra a modificación substancial das condicións de traballo a oito operarios. Con ocasión do paro, os traballadores realizaron unha concentración diante da sede de Emalcsa (Empresa Municipal de Augas da Coruña) para demandar da entidade, como concesionaria do servizo, que medie no conflito e non permita nin dea cobertura ás ilegalidades cometidas por Valoriza Auga.