Os traballadores e traballadoras de Albada, a empresa concesionaria da planta de tratamento de residuos de Nostián, na Coruña, decidiron en asemblea desconvocar a folga indefinida que mantiñan dende hai case unha semana e déronlle o visto bo ao novo convenio colectivo. As negociacións, que se prolongaron durante máis de 10 horas, pecháronse na madrugada do sábado despois de que a compañía se comprometese a readmitir a un empregado e aceptase o sistema de quendas de traballo proposto polo comité de empresa.

A práctica totalidade do cadro de persoal da empresa Albada, concesionaria da planta de tratamento de residuos da Coruña, secundou a primeira xornada de folga convocada para esixir a readmisión do compañeiro despedido e reclamar o cumprimento do preacordo acadado o pasado 24 de abril. O comité anunciou que denunciará os servizos mínimos ao consideralos abusivos xa que a compañía fixounos no 95% dos traballadores e traballadoras que se atopan activos neste momento tendo en conta que parte do plantel goza na actualidade das súas vacacións de verán.

O Comité de Albada acordou, durante a xuntanza celebrada esta tarde no edificio de sindicatos, convocar folga indefinida na planta de tratamento de residuos urbanos de Nostián, a partir das 21:00 horas do próximo domingo 10 de xullo.

Diante das periódicas disputas de carácter político xurdidas pola falta de garantías no financiamento do Porto Exterior da Coruña e os constantes cruces de acusacións entre a Autoridade Portuaria e o ente público Puertos del Estado (Ministerio de Fomento), a CIG e o Comité de empresa da UTE Langosteira esixen un entendemento entre todas as partes implicadas para acadar unha solución definitiva de xeito que se garantan os orzamentos necesarios para a conclusión dos traballos e a continuidade dos empregos.

A CIG-Saúde revalidou a súa presenza no Comité de empresa do Hospital Santa Teresa da Coruña ao obter 9 dos/as 13 delegados/as que se elixían nas eleccións celebradas o mércores 22 de xuño. Con este resultado, a CIG-Saúde consolida a maioría absoluta e mantense como primeira forza sindical neste centro.

O Comité de Emesa mantivo esta mañá unha xuntanza co Delegado do Goberno na Galiza, Miguel Cortizo para trasladar a problemática laboral na que está inmersa o cadro de persoal da factoría de Coirós, que arrastra tres EREs consecutivos. A representación dos traballadores/as demandou, ao igual que xa fixo coa Xunta en reiteradas ocasións, a implicación real do Goberno español neste conflito para garantir a continuidade de Emesa e o mantemento dos empregos.

Traballadores de Elaborados Metálicos Emesa, pertencente ao grupo Isolux Corsán, concentráronse na mañá deste xoves diante da Xefatura Territorial da Consellaría de Traballo e Benestar da Coruña para demandar a implicación da Xunta na loita polo futuro da factoría de Coirós, xusto no momento que se cumpren tres meses de aplicación do terceiro expediente de regulación e ante a ausencia de manobras por parte da dirección na procura de carga de traballo.