A CIG de Ourense vén de presentar unha proposta alternativa co obxectivo de reconducir o plan de axuste económico do Concello de Xinzo de Limia. Os plans municipais contemplan, entre outras medidas, a redución de medio millón de euros en gastos de persoal mediante un ERE extintivo que afectaría a 25 traballadores/as. A central nacionalista, que xa denunciara que o Goberno local pretende aplicarlle os recortes unicamente ao persoal laboral, achega agora unha proposta que permitiría non ter que reducir esta cantidade en gastos de persoal e evitaría os despedimentos, aliviaría a presión fiscal sobre os veciños/as e produciría un superavit de 2 millóns de euros en 10 anos. [CONSULTA O DOCUMENTO AO FINAL DA NOTICIA].

A CIG de Ourense denuncia que o plan de axuste económico elaborado polo Concello de Xinzo de Limia contempla unha redución salarial só para o persoal laboral, polo que a central nacionalista reclamará que “os esforzos que haxa que facer sexan conxuntos”. Diante disto, aceptarían unha pequena baixada dos salarios sempre e cando afecte ao conxunto do cadro de persoal municipal.

Dende a CIG-Administración critican a desidia da xefatura territorial da Consellería de Traballo e Benestar de Ourense no que respecta á atención dos centros de maiores. A central nacionalista denunciara o pasado día 7 de novembro que na Residencia do Maior Nosa Señora dos Milagres había varios casos de sarna entre os residentes e os/as empregados/as. “A día de hoxe, e por culpa da deixadez tanto da dirección do centro coma do xefe territorial do departamento autonómico, José Selas, os casos elévanse a máis de 40, dos que máis de 20 son traballadores/as do centro”, censuran. Diante disto, reclaman o cese inmediato do director do centro e do responsábel autonómico.

Os secretarios comarcais das federacións de Banca, Administración, Metal, FGAMT e Servizos compareceron hoxe para anunciar a presentación de demandas de conflito colectivo -que se intentará, cando sexa posíbel, facelo coas outras organizacións sindicais- contra as empresas públicas nas que se está a aplicar de forma ilegal o Real Decreto Lei 8/2010 de medidas para reducir o déficit público.

Os traballadores/as e traballadoras das Administración Públicas ficaron sorprendidos ao recibir a nómina do mes de xaneiro, xa que todo o persoal cobrou entre 10 e 30 euros menos que nunha mensualidade habitual. A escasa suba salarial pactada e decretada polo Goberno do Estado, coa conivencia dos sindicatos estatais, e a eliminación da rebaixa dos 400 euros na retención do IRPF, teñen provocado unha importante perda do poder adquisitivo dos traballadores e traballadoras das administracións públicas.

Ás 11 da mañá congregábanse, ás portas do Parlamento de Galiza, traballadoras e traballadores dos servizos de emerxencia para participar na manifestación en demanda da creación dun servizo público galego de prevención, extinción de incendios e salvamento e contra a súa privatización. A marcha non pasou desapercibida polas rúas de Compostela e os petardos e os botes de fume foron os protagonistas. A manifestación rematou en San Caetano coa lectura do manifesto conxunto asinado pola CIG, CCOO e UGT.

Na que, probablemente, será a derradeira Mesa Xeral de Empregados Públicos o vindeiro 18 de decembro, a Consellaría da Presidencia na súa proposta de modificación de relación de postos de traballo remitida ás centrais sindicais con representación na mesma, presentará a amortización de 83 postos de traballo, 55 deles con traballadores/as en activo que pasarán a engordar as listas de desemprego deste País.