Arredor dun cento de delegados/as do sector do automóbil da CIG -das federacións do Metal e de Químicas- ocuparon hoxe simbolicamente as oficinas da Inspección de Traballo en Vigo para esixir o cumprimento dos acordos en materia de prevención e saúde laboral. Dende a central nacionalista explican que a autoridade laboral se comprometera a analizar as condicións de traballo nunha serie de empresas que envían á Seguridade Social os traballadores con doenzas derivadas da labor que realizan en lugar de seren atendidos nas mutuas das propias compañías.

Arredor de medio cento de delegados e delegadas da CIG en empresas da automoción concentráronse esta mañá diante da sede da Xunta de Galiza en Vigo para rexeitar a autorización masiva de Expedientes de Regulación de Emprego no sector sen que existan razóns obxectivas. Dende a Coordinadora do Automóbil da central nacionalista instan á Administración autonómica e á Inspección de Traballo a velar polos intereses dos traballadores/as e impedir que se sigan a utilizar fondos públicos na aplicación dos EREs.

Máis dun cento de delegados/as da CIG en empresas da automoción participaron hoxe nunha xornada técnica sobre saúde laboral que serviu para iniciar unha campaña contra o non recoñecemento de enfermidades profesionais por parte das mutuas médicas. Ao remate da sesión desprezáronse até a sede do Cluster de Empresas de Automoción de Galicia (Ceaga), na avenida Citröen de Vigo, para realizar unha concentración coa que esixiron o cumprimento da normativa en materia de saúde laboral nas compañías asociadas.

O cadro de persoal de Treves Pontevedra aproveitou a primeira xornada de folga para realizar unha concentración de protesta diante da Inspección de Traballo en Vigo co obxectivo de reclamar unha mediación activa no conflito laboral coa empresa de automoción. A decisión de convocar un paro que terá continuidade este xoves adoptouse para esixir carga de traballo que permita o mantemento de todos os empregos e para denunciar que a dirección négase a publicar como convenio o acordo laboral acadado tras as mobilizacións de febreiro.

 O comité de empresa de Treves Pontevedra denunciou o que considera un peche patronal despois de que a produción da compañía con sede no polígono do Campiño permanecese suspendida por orde da dirección ante os problemas de subministro que sofre Citröen. Dende a CIG denuncian que o peche produciuse sen que se tivese respectado a obrigación de comunicalo con tres días de antelación e reiteran que manteñen a convocatoria de folga para a semana que vén. 

Os traballadores e traballadoras de Denso decidiron hoxe en asemblea desconvocar a folga indefinida que mantiñan dende o pasado luns para protestar polo bloqueo nas negociacións do convenio. A fin do conflito foi posíbel despois de que a empresa aceptase as propostas de incremento salarial, redución de xornada ou o 100% no caso de baixa por accidente laboral ou enfermidade profesional, ademais de comprometerse a facer fixos a un grupo de 15 empregados/as en tres anos.

A práctica totalidade do cadro de persoal da empresa de compoñentes para a automoción Denso secundaron a primeira xornada de folga convocada polo comité de empresa (CIG, UGT e CCOO) para protestar polo bloqueo nas negociacións do convenio colectivo. Os arredor de 220 traballadores e traballadores permanecen concentrados ás portas da compañía no polígono industrial de Valadares. O secretario comarcal do Metal e o voceito da coordenadora do Automóbil da CIG achegáronse ao lugar para amosarlles a súa solidariedade. Os traballadores/as anunciaron que manterán a protesta até que as súas demandas sexan atendidas.