Delegados e delegadas da CIG de Compostela, vestidos de presidiarios, ocuparon esta mañá a oficina principal de Novagalicia Banco, no centro de Santiago, a gritos de  “Que deteñan aos ladróns”, “Non, non, non  á privatización”, “Queremos unha caixa e non un banco” ou “Non faltan cartos, sobran ladróns”. A ocupación da entidade encádrase na campaña que a CIG leva meses desenvolvendo para concienciar á poboación de que si existen alternativas ás políticas que desde os gobernos se están a impor e para chamar a participar na mobilización convocada pola central este domingo 23 de outubro.

Dando continuidade a campaña posta en marcha pola CIG baixo o lema “Si, existen alternativas! En defensa do emprego e dos servizos públicos”, celebrouse en Lugo unha asemblea de delegados e delegadas na que o secretario xeral, Suso Seixo, acompañado polo secretario comarcal, Xosé Ferreiro, defendeu que existen alternativas ao modelo neoliberal para recuperar a economía, apoiar os sectores produtivos e crear emprego. Seixo chamou a participar na manifestación convocada pola central sindical, o vindeiro 23 de outubro, lembrando que só coa mobilización social a clase traballadora pode defender os seus dereitos.

O persoal do 112 estivo presente o día 11 no acto de campaña do PP de Teo, ao que asistiu Alfonso Rueda, conselleiro da Presidencia da Xunta e segundo denuncian, “máximo responsábel do conflito do Centro de Atención de Emerxencias de Galiza”. No acto, que se insire dentro da campaña de visualización social do conflito levada a cabo polos traballadores e traballadoras desde hai varios meses, e que inclúe tamén a presenza en actos da campaña das eleccións municipais, despregouse unha faixa na que se culpaba directamente á Xunta de Galiza pola súa xestión neglixente e polas promesas incumpridas.

Caravanas de vehículos, pegada de carteis, pintada de murais,... As actividades para publicitar a convocatoria da folga xeral da CIG deste xoves 27 de xaneiro estanse a intensificar nos días previos á xornada de paro, co obxecto de trasladar a todos os galegos e galegas a necesidade de dar unha resposta contundente se queremos frear a vaga de ataques que os gobernos, atendendo aos intereses do capital financeiro, están a perpetrar contra a clase traballadora.

A CIG-Ensino compareceu esta mañá en rolda de prensa para valorar o anteproxecto de Lei de Convivencia e Participación da Comunidade Educativa e dar a coñecer as propostas e as accións que a Federación vai levar adiante para mudar dita normativa. En dita campaña está prevista a realización de máis de 1200 asembleas nos centros, recollida de sinaturas e pronunciamentos dos Claustros.

Apurando ás últimas horas antes da xornada de folga xeral, a CIG-Mocidade de Ferrol ten intensificado a campaña de información e chamamento á participación tanto no paro como nas manifestacións que a central ten convocadas o mércores 29 de setembro. Así, duplicouse o esforzo no reparto de material, asembleas, pega de carteis e elaboración de murais.

Representantes de Queremos Galego fixeron entrega, este mércores 5 de maio, no Rexistro Xeral da Xunta de Galiza, de 4.530 sinaturas do profesorado que se adheriu á campaña “Dou e darei as clases en galego”, coa que expresa a súa intención de continuar a impartir as aulas en galego e manifesta, explicitamente, o seu rexeitamento ao decretazo. A campaña púxose en marcha por mor do ataque, sen precedentes, contra o noso idioma ao incluír o mal chamado ‘decreto de plurilingüismo’ a prohibición  -que por vez primeira se recolle na lexislación galega- de impartir materias en lingua galega, nomeadamente as de Matemáticas, Física e Química e Tecnoloxía, ademais de proscribir o galego na práctica en toda a educación infantil das cidades e principais vilas do país.