Unha representación das Executivas da CIG e do BNG celebraron este martes unha reunión conxunta para avaliar a situación económica, social e laboral do país. Ao remate da xuntanza Xavier Vence e Suso Seixo manifestaron a coincidencia nas análises e a intención de ambas as dúas organizacións de impulsar mobilizacións para reclamar outras políticas económicas, industriais e financeiras. En concreto sinalaron a folga xeral comarcal convocada en Ferrolterra para o vindeiro 12 de xuño, unha convocatoria que, segundo adiantou Seixo, a CIG quere impulsar tamén en Vigo.

A vindeira fin de semana celebrarase en Compostela, o VI Congreso da Confederación Intersindical Galega, no que participarán un total de 682 congresistas: 540 delegadas/os elixidas/os polas distintas federacións nas comarcas; 136 membros do Consello confederal e 6 da Comisión de Garantías. Está xa confirmada a presenza de 25 delegacións internacionais. O lema escollido pola central sindical “É necesario. É posíbel. Organización, loita, soberanía”, sintetiza os principais elementos a debate.

Arredor de 700 persoas participaron hoxe na manifestación convocada pola CIG para rexeitar os plans de Unísono de deslocalizar 97 empregos de Vigo a Madrid, mobilización coa que se puxo fin á campada iniciada diante da empresa a noite anterior. Ao mesmo tempo, dende a central nacionalista cifran nun 70% o seguimento da xornada de folga convocada na compañía de telemárketing.

A executiva nacional da sección sindical da CIG en Telefónica fixo público un comunicado no que se solidariza coa loita que están a desenvolver as traballadoras/es de Unísono e Atento en defensa do emprego. Nesta liña, denuncian o “progesivo desmantelamento” do sector de servizos de xestión telefónica en Galiza.

Os traballadores/as públicos/as dos Xulgados galegos están en pé de guerra contra os plans do Goberno español do PP de privatiza o Rexistro Civil. En Vigo, máis de 200 funcionarios/as manifestáronse para rexeitar a reforma que prepara o ministro de Xustiza. Houbo mobilizacións noutros puntos do país.

O sector naval da Ría de Vigo volveu a saír hoxe á rúa para denunciar a parálise do sector e a perda de case 11.000 postos de traballo directos dende 2008, o que representa o 80% do emprego dunha industria que chegou a ocupar a unhas 14.000 persoas. Dende as centrais CIG, CCOO e UGT anunciaron a posta en marcha dunha campaña de sensibilización social que incluirá distintas mobilizacións.

A forGA e a CIG, á vista da vergoñenta política de tallos de dereitos e privatizacións de servizos públicos protagonizada polo PP e conscientes da importancia da formación para o emprego para os traballadores/as, vimos de asinar un Convenio de Colaboración dirixido a pór en marcha un programa de cualificación e/ou recualificación profesional para os afiliados/as da central e para aqueles/as usuarios da forGA que se afilien á CIG e que desexen acceder a este tipo de servizos formativos nunhas condicións económicas vantaxosas.