Promocións Culturais Galegas, empresa editora do xornal A Nosa Terra, vén de ser liquidada mediante un auto emitido polo Xulgado do Mercantil número de 3 de Pontevedra. A resolución xudicial pecha deste xeito a fase de convenios unha vez esgotado o prazo sen que se presentase ningunha proposta e deixa a compañía baixo a dirección da administración concursal. Os traballadores/as do histórico semanario nacionalista continúan á espera de cobrar as liquidacións e os salarios que aínda se lles adebedan.

O secretario nacional da CIG-Químicas, Alberto Gonçalves, compareceu hoxe xunto ao deputado do BNG Henrique Viéitez para esixirlle ao Goberno español que publique de inmediato a orde ministerial sobre produción de biodiesel que recolle “a subida e reserva” do 7% de biocarburantes para o consumo interno. O representante sindical anunciou que a central adoptará “medidas de presión” no caso de que non se dean pasos para desbloquear a actual “parálise do sector”.

A Confederación Intersindical Galega (CIG) venceu nas eleccións sindicais celebradas recentemente en Forbos Adhesives Spain ao sumar un delegado/a máis que CCOO. Deste xeito, a central nacionalista acadou tres dos cinco representantes que se escollían no comité da empresa con sede en Mos.

Numerosos delegados/as sindicais e traballadores e traballadoras da automoción de Vigo participaron hoxe nas concentracións convocadas pola CIG ás portas das empresas Faurecia e Denso para reclamar convenios colectivos xustos e rexeitar a precariedade laboral que pretenden impoñer as compañías do sector. A acción reivindicativa incluíu o reparto de folletos e a realización de asembleas para informar do estado das negociacións dos convenios e das pretensións da patronal de empeorar as condicións de traballo.

A federación de Químicas e Enerxía da CIG logrou rematar con 20 anos de hexemonía da UGT na compañía porriñesa CZ Veterinaria ao acadar sete dos nove delegados/as do comité de empresa nas eleccións sindicais celebradas recentemente. A central nacionalista obtivo un total de 77 votos fronte aos 26 que sumou a candidatura presentada polo sindicato español, que até o de agora ostentaba os nove representantes.

A CIG gañou as eleccións sindicais celebradas o pasado martes 24 de maio en Emalcsa (empresa municipal de augas da Coruña) ao acadar catro dos nove delegados/as que conformarán a representación do persoal.

O cadro de persoal de Rodman Polyships aprobou por unanimidade o ERE extintivo presentado pola empresa despois de que o comité lograse introducir unha cláusula que establece a creación dunha bolsa de emprego que vincula a reincorporación dos traballadores/as despedidos á futura recuperación da compañía. Ao mesmo tempo, o acordo coa firma de construción naval con sede na parroquia moañesa de Meira, que foi ratificado onte en asemblea, inclúe unha serie de medidas que reducen nun 40% o impacto da proposta inicial de eliminar 120 dos 277 empregos.