O Tribunal Superior de Xustiza de Galiza vén de invalidar o pronunciamento que o Xulgado do Social número 1 de Ourense realizara sobre o plus de actividade no marco do conflito colectivo presentado sobre a legalidade ou non da xornada imposta pola empresa en xaneiro do 2009. A sentenza do TSXG vén dar a razón aos argumentos manexados pola CIG e os traballadores/as, quen no seu día denunciaron a incrongruencia das consideracións xudiciais sobre uns feitos que se estaban a dirimir no ámbito laboral.

O Comité de empresa do persoal laboral do Concello de Verín reclamou ao rexedor local a creación do Comité de Seguridade e Saúde e que atenda ás necesidades en materia de prevención de riscos, pois, segundo explican, nin o persoal ten a formación e información adecuada para desenvolver o seu traballo nin os propios delegados/as teñen a certeza de que estean realizadas as avaliacións de riscos ou os planos de prevención. Así mesmo, reiteraron as demandas ao alcalde de Verín para que sente a negociar o convenio colectivo, caducado xa en 2007.

Unha representación do Corpo da Policía Local de Verín, acompañado por delegados e delegadas da CIG, deu continuidade ás mobilizacións que emprendeu hai máis dun ano cunha concentración este luns, 25 de Xaneiro, diante dos edificios da Deputación de Ourense para denunciar a falta de negociación colectiva no Concello e reclamar á institución provincial que medie diante do alcalde de Verín, co obxecto de promover o inicio dun diálogo coas organizacións sindicais e os traballadores/as.

Unha representación do Corpo da Policía Local de Verín, dando continuidade ás mobilizacións que emprendeu hai máis dun ano, manifestarase e concentrarase o próximo luns, día 25 de Xaneiro, en Ourense para reclamar ao alcalde do Concello que abra unha vía de negociación colectiva “real e seria” que propicie a normalización das relacións laborais na institución local, así como a aplicación da Lei de Coordinación dos axentes locais, en vigor dende hai case tres anos. Dende a Unión Local da CIG de Verín laméntase que a actitude do rexedor local teña obrigado ao persoal municipal a defender as súas lexítimas reivindicacións a través da vía xudicial.

Uns 80 traballadores e as traballadoras da Vidreira do Atlántico concentráronse na mañá deste mércores diante do Pazo de Xustiza de Ourense para reclamar á xuíza que leva a demanda concursal que atenda as reclamacións do persoal e se pronuncie dunha vez sobre todas as medidas adoptadas pola empresa. Dende a CIG reclámase á autoridade xudicial que ampare ao conxunto dos traballadores/as que levan máis dun ano loitando pola defensa dos seus dereitos e que agora se atopan nunha complicada situación por causa da decisións arbitrarias do Grupo BA Vidro.

A dirección da Vidreira do Atlántico vén de dar un paso para o peche definitivo da empresa, logo de decidir, a pesar de non contar coa autorización xudicial pertinente, a clausurar o forno de fusión da factoría, provocando así a falta de ocupación efectiva dos traballadores e traballadoras. Contra esta decisión, o persoal e a CIG, que xa presentaron recurso de apelación contra o auto que estima a solicitude de concurso, van formular demanda laboral por falta de traballo (ocupación efectiva) e denuncia penal por esta acción do Grupo BA Vidrio, ademais de recusar aos administradores concursais nomeados pola súa “inexplicábel pasividade” fronte ás actuacións contra a actividade e o emprego.