Arredor de 30 traballadores/as de VIPROGA e delegados/as da CIG-Servizos de Compostela concentráronse o pasado 29 de maio diante do Concello de Camariñas, onde tiña lugar unha sesión plenaria da Corporación. O persoal da empresa de vixilancia privada trasladouse até esta localidade para reclamar ao propietario da mesma, e voceiro do PP en Camariñas, o pago das dúas mensualidades que aínda adebeda a uns 50 empregados.

A CIG de Verín fixo un chamamento a todos os afiliados e afiliadas a participar na concentración convocada o vindeiro martes 2 de xuño, ás 12:00 horas, diante da Subdelegación do Goberno de Ourense. O obxecto da mobilización é amosar a solidariedade cos compañeiros/as que traballan no Concello de Rairiz de Veiga e rexeitar a actitude de “discriminación, intransixencia e desprezo absoluto aos dereitos dos traballadores/as” amosada polo rexedor local.

Traballadores/as de Ingemarga concentráronse na mañá do 27 de maio diante dos edificios da Xunta en Lugo en contra do ERE presentado pola empresa e que suporá o despedimento de case a metade do persoal da fábrica que o grupo vasco ten en Guitiriz. Practicamente a totalidade do cadro de persoal, acompañado de representantes sindicais, secundaron a protesta a través da que pretenden amosar o seu total rexeitamento ao expediente de regulación na empresa e reiteraron que non van negociar “nin un só despedimento”.

As traballadoras e traballadores de Caramelo desenvolveron a segunda xornada de folga consecutiva na fábrica de A Grela e continuaron coas protestas pola cidade de A Coruña, logo do fracaso da reunión mantida coa dirección da empresa, na que novamente se negaron a entregar unha parte da documentación solicitada polos representantes dos traballadores/as. O persoal concentrouse diante da Fundación María José Jove e manifestouse até a tenda de Caramelo situada en Catro Camiños para rexeitar, unha vez máis, un ERE que cualifican de “fraude” e que suporá o despedimento de 237 persoas na fábrica coruñesa.

Os traballadores e as traballadoras de Ingemarga concentraranse o vindeiro mércores 27 de maio ás 12:00 horas diante do edificio administrativo da Xunta en Lugo como medida de protesta contra o ERE presentado pola empresa e que afectará a máis do 40% do cadro de persoal da planta de Guitiriz. A medida enmárcase dentro do calendario de mobilizacións establecido polos traballadores/as que tamén secundarán paros parciais na fábrica e teñen previsto desenvolver unha manifestación o vindeiro 13 de xuño.

A CIG-Ensino, xunto coas demais organizacións sindicais con representación na Mesa Sectorial de Ensino non Universitario, abandonaron a reunión ante a negativa da Consellaría de Educación de retirar a circular sobre o agrupamento de alumnos de distintos cursos ou ciclos nunha aula. As organizacións sindicais acordaron emitir resolucións das Xuntas de Persoal das catro provincias e convocar unha concentración de delegados/as do ensino público o mércores 3 de xuño diante dos edificios de San Caetano.

Como ven sendo habitual sempre que ten lugar na comarca de A Mariña un fatídico accidente laboral que remata coa morte dun traballador/a, e con motivo do lamentábel suceso acaecido o pasado venres 22 de maio nunha obra do Concello de Burela, que lle custou a vida ao traballador da construción J.G.B., de 43 anos de idade, a CIG-A Mariña levou a cabo unha concentración silenciosa en mostra de solidariedade co finado, a súa familia e os seus compañeiros/as de traballo.