A CIG-Ensino, xunto coas demais organizacións sindicais con representación na Mesa Sectorial de Ensino non Universitario, abandonaron a reunión ante a negativa da Consellaría de Educación de retirar a circular sobre o agrupamento de alumnos de distintos cursos ou ciclos nunha aula. As organizacións sindicais acordaron emitir resolucións das Xuntas de Persoal das catro provincias e convocar unha concentración de delegados/as do ensino público o mércores 3 de xuño diante dos edificios de San Caetano.

Como ven sendo habitual sempre que ten lugar na comarca de A Mariña un fatídico accidente laboral que remata coa morte dun traballador/a, e con motivo do lamentábel suceso acaecido o pasado venres 22 de maio nunha obra do Concello de Burela, que lle custou a vida ao traballador da construción J.G.B., de 43 anos de idade, a CIG-A Mariña levou a cabo unha concentración silenciosa en mostra de solidariedade co finado, a súa familia e os seus compañeiros/as de traballo.

Traballadores e traballadoras de Correos na provincia de A Coruña continúan co calendario de mobilizacións para exixir á empresa a contratación de novo persoal e a mellora da cualidade do servizo. Desta volta as concentracións trasládanse até a Oficina principal de Ferrol, onde desenvolverán unha concentración ás 18:00 horas do 20 de maio, convocada pola Xunta de Persoal e o Comité de Empresa da Provincia.

O xuízo que se segue contra o secretario comarcal da CIG de Ferrol, Xesús Anxo López Pintos, por supostamente agredir a un policía durante unha carga, quedou visto para sentenza na mañá do 18 de maio. A Fiscalía e a acusación particular manteñen as súas peticións de dous anos e medio e cinco anos de cárcere respectivamente, mentres que a defensa destacou que se trata dunha persecución contra Pintos e o sindicalismo que representa, pois, cando menos sorprende que estando presentes no conflito representantes de CCOO e UGT a acusación se limite ao representante da CIG.

As traballadoras e os traballadores de Caramelo trasladaron as súas reivindicacións até os edificios da Xunta de Galiza en Compostela para reclamar ao goberno galego que rexeite o ERE presentado pola empresa e demandar ao conselleiro de Economía que atenda a solicitude de reunión cursada hai máis dun mes. Hai que lembrar que a Consellaría posúe o 7,5% das accións da empresa, polo que dende o Comité e a CIG reclámase unha maior implicación e que non empregue os cartos “de todos os galegos e as galegas para acometer 237 despedimentos e para que aquí se estea preparando un posíbel peche definitivo de Caramelo en A Grela”.  

Os xulgados do penal de Ferrol volverán ser o vindeiro luns 18 de maio o punto de encontro para afiliados/as e representantes sindicais da CIG na comarca, convocados a asistir a unha concentración en apoio do secretario comarcal. O motivo: a celebración da última vista dentro do proceso que se segue contra, Xesús López Pintos, que quedará visto para sentenza.

Os traballadores e traballadoras de Elaborados Metálicos Emesa concentráronse na mañá do 13 de maio diante da delegación provincial de Traballo, en cuxo interior se celebraba o acto de conciliación polo despedimento de 22 compañeiros o pasado mes de marzo. Posteriormente, o persoal de Emesa trasladouse até as instalacións da fábrica en Coirós, onde levou a cabo un paro diante das oficinas e leu un comunicado en apoio aos traballadores despedidos.