Os delegados sindicais da CIG e CCOO na lousa de Ipisa en Carballeda, Valdeorras, concentráronse o xoves 29 de xaneiro para protestar contra a represión sindical que están a vivir os seus compañeiros de traballo, desde que comezaran a mobilizarse para acadar melloras de hixiene, seguridade e laborais nos seus postos de traballo. No interior da nova podedes visualizar unha pequena peza audiovisual deste acto.

Delegados e delegadas da CIG-Saúde concentráronse diante do edificios administrativos da Consellaría de Sanidade en Compostela para demandar a modificación do acordo da mesa central de contratación do persoal inscrito na listaxe de vinculacións temporais. Dito acordo permitiría que un profesional inscrito na lista de Ourense tivera que desprazarse até Verín para traballar.

As traballadores de Confecciones Lema van continuar coas mobilizacións para reclamar o pago dos salarios atrasados e das indemnizacións polo peche da empresa. Desta volta, concentraranse diante da nave de Lestedo o 23 de xaneiro a partir das 10:30 horas. As 12 traballadoras afectadas levan sen cobrar tres meses e agora enfróntanse a un ERE mediante o que a dona da empresa pretende despedilas de xeito barato.

A CIG-Servizos convocou unha concentración nacional o martes 20 xaneiro a prol de conseguir un convenio colectivo de ámbito galego no sector da seguridade privada, vista a parálise que está a sufrir a negociación a nivel estatal. A mobilización terá lugar na Praza do Toural de Compostela a partir das 11:30 da mañá coincidindo coa celebración en Madrid dunha nova xuntanza da Mesa Negociadora.

A dirección internacional de Astrazeneca, ten a intención de pechar a súa factoría de O Porriño, se o 31 de xaneiro non encontra comprador para esta fábrica, e nese caso deixará a todos os traballadores/as na rúa (113 traballadores/as), aínda despois de obter uns beneficios por riba do esperado. A compañía quere desviar a fabricación dos seus produtos a países con man de obra máis barata, e sen embargo pretende continuar a vender aqui os seus produtos. Por estes motivos, a sección sindical da CIG na farmacéutica convoca unha nova concentración de rexeitamento a esta destrución do emprego.

Desde as dez e media da mañá perto de noventa traballadoras e traballadores de Valeo concentrábanse diante do Pavillón dos Remedios, para denunciar a situación do persoal desta fábrica do Porriño, que leva desde o 31 de decembro pechada, diante do mitín que o PSOE celebraba na cidade de Ourense, coa presenza dos presidentes do goberno español e galego. Estas traballadoras conseguiron facerlle entrega de dúas cartas dirixidas a Zapatero e Touriño, e denunciaron que "estamos fartas de enganos e o que precisamos é rematar coa incertidume destas máis de noventa familias afectadas".

Os traballadores da empresa viguesa de electricidade Rodi hai unha semana que encontraron as portas da sua empresa pechadas, ademais de levar desde o mes de outubro co impago dos seus salarios, polo que desde o 7 de xaneiro mobilizaranse para demandar que se lles reintegre as cantidades que se lles deben e polo mantemento dos postos de traballo. O mércores mobilizáronse ao longo da mañá, desde as dez, fronte á estación de servizo de Teis e xunto a Fenosa.