O Secretariado Confederal da CIG, reunido este martes en Compostela, acordou convocar concentracións de delegados/as para este xoves, 12 de xaneiro, diante das delegacións de Facenda da administración central para manifestar o seu rexeitamento ás medidas aprobadas, vía decreto, polo goberno do PP. A central sindical, que tamén celebrará asembleas para analizar o novo escenario, considera que estas decisións son claramente negativas para a clase traballadora porque “os recortes do investimento público provocarán máis destrución de emprego e o deterioro dos servizos públicos e as medidas fiscais adoptadas nada teñen que ver coa reforma fiscal que sería necesario acometer”, afirma o Secretario Xeral, Suso Seixo.

No decurso da mañá deste 25 de novembro, Día Internacional contra a violencia contra as mulleres, celebráronse concentracións simbólicas nas distintas comarcas de Galiza, para denunciar as consecuencias que as políticas de recorte dos gobernos do PSOE e do PP están a ter para as mulleres. Medidas que, co pretexto da crise, eliminan prestacións, servizos e dereitos, agravando aínda máis as desigualdades entre homes e mulleres.

Varios centos de delegados e delegadas da CIG concentráronse este mediodía diante dos Consulados de Portugal en Vigo e Ourense en solidariedade coa folga xeral convocada no país veciño para este xoves 24 de novembro. Co acto desta mañá preténdese trasladar o apoio da clase traballadora galega ao paro promovido polas dúas principais centrais do país veciño, a CGTP/IN e a UGT, para denunciar as medidas de austeridade que se imporán á maioría social e que terán como consecuencia a recesión económica, o aumento da explotación e o empobrecemento xeneralizado da poboación.

A maioría dos centros amosaron hoxe, con concentracións e outras accións durante a hora do recreo, o seu rexeitamento aos recortes que a consellaría de Educación está a levar no ensino público en Galiza. Ao mesmo tempo reclamouse máis profesorado e recursos para os centros. Estas accións encádranse no calendario de mobilizacións previstas para este mes, que continuarán con concentracións nas principais vilas e cidades galegas o vindeiro día 18 e cun referendo entre o profesorado, convocado para o día 25.

O profesorado do ensino público concentrarase este martes, día 11 de outubro na hora do recreo nos propios centros para manifestar, unha vez máis o seu rexeitamento aos recortes aplicados pola consellaría ao ensino público, a ampliación do horario lectivo, a obriga de custodiar o alumnado e en defensa do ensino público. Estes actos forman parte do calendario de mobilizacións previstas para este mes, que continuarán con concentracións, o día 18 en diferentes localidades galegas e cun referendo que o profesorado levará a cabo o día 25.

Delegados e delegadas da CIG concentrábanse este martes, en toda Galiza, contra a reforma da Constitución aprobada o pasado venres no Congreso dos Deputados. Unha reforma que limita o gasto público e que, segundo afirmou Suso Seixo na súa intervención na asemblea de delegados/as de Compostela, “terá graves consecuencias” de forma inmediata, con recortes en políticas sociais, en Ensino, Sanidade ou infraestruturas, limitando aínda máis a capacidade de Galiza “para decidir por nós mesmos as nosas políticas económicas”.

O Comité de Empresa da Fundación para o Fomento da Calidade Industrial e o Desenvolvemento Tecnolóxico de Galiza vén de denunciar publicamente as lamentábeis condicións laborais nas que se atopan os traballadores e traballadoras dos Servizos Centrais. Para dar a coñecer a súa situación, os traballadores/as concentráronse ás portas da consellaría de Industria, en Compostela, este xoves día 23 de xuño e o venres 24 e non descartan continuar coas mobilizacións.