Delegadas do Consorcio Galego de Servizos de Igualdade e Benestar acompañadas polo secretario nacional de CIG-Ensino, Anxo Louzao, desmentiron esta mañá, en rolda de prensa, todas e cada unha das declaracións realizadas pola Secretaria Xeral, Susana López Abella, o pasado sábado, ante os medios de comunicación. Unhas declaracións coas que consideran que se difama ao persoal das oficinas do Consorcio e das que exixen a súa rectificación.

O Comité de Empresa do Consorcio Galego de Servizos de Igualdade e Benestar de Ourense vén de denunciar publicamente os problemas que están a acontecer coas listaxes de agarda. O Comité comunicou en múltiples ocasións as eivas das listas ao organismo e dirixiu, na primeira semana de setembro, un escrito ao Xerente do Consorcio sen que a día de hoxe obtivese contestación.

Delegados e delegadas da CIG concentráronse diante da consellaría de Traballo e Benestar Social para denunciar a situación de parálise na que se atopan as relacións laborais no Consorcio Galego de Servizos de Igualdade e Benestar, co que isto supón de incerteza nos traballadores e traballadoras e de precariedade no servizo.

O Comité de Empresa do Consorcio Galego de Servizos de Igualdade e Benestar de Ourense emitiu unha nota de prensa, que reproducimos integramente a continuación, para denunciar a situación de falta de persoal nos centros de día, asi como atrasos no pago de noites e festivos, e outras irregularidades como problemas de seguridade nunha galescola desta provincia, entre outras situacións, que xa foron postas en coñecemento da xerencia deste organismo.

Diante da parálise da Consellaría de Traballo a respecto da situación laboral dos traballadores e traballadoras do Consorcio Galego de Servizos de Igualdade e Benestar e da paralización dos procesos selectivos sen xustificación, a CIG-Ensino ten anunciado que vai iniciar unha serie de mobilizacións entre as que se levarán a cabo unha concentración de delegados/as o vindeiro 7 de outubro diante dos edificios da Xunta en San Caetano, unha recollida de sinaturas en apoio á táboa reivindicativa do colectivo, resolucións dos comités, etc.

Os xulgados do contencioso administrativo número 1 e 2 de Compostela veñen de ditar cadanseu auto no que se desestima a solicitude de adopción da medida cautelar de paralización das probas de acceso ao Consorcio Galego de Servizos de Igualdade e Benestar. Dende a CIG-Ensino destacan que "isto pon en evidencia a estratexia de quen usou a difamación para intentar paralizar as probas selectivas, baseándose nunha suposta ilegalidade".

A CIG-Ensino fixo entrega na mañá do 19 de maio de 5.546 sinaturas en defensa do mantemento dos postos de traballo no Consorcio Galego de Servizos de Igualdade e Benestar, do carácter público dos servizos que ofrece e en demanda da realización inmediata dos procesos selectivos paralizados como consecuencia das eleccións galegas. No escrito rexistrado na Xunta, as catro presidentas dos Comités provinciais do Consorcio lembran as declaracións realizadas por Feijoo en relación ao organismo e advirten á Conselleira de Traballo e Benestar que “non imos aceptar ningún paso atrás en materia de prestacións sociais”.