O Tribunal Superior de Xustiza de Galiza (TSXG) ratificou a sentenza do Xulgado do Social número 3 de Vigo que condena o hospital Povisa a repoñer as xornadas laborais de tres quendas (mañá, tarde e noite), segundo confirmaron representantes do comité de empresa. Ao mesmo tempo, anunciaron que seguirán coas mobilizacións para reclamar a negociación do convenio colectivo antes de que decaia no mes de xullo e as condicións laborais e salariais empeoren “entre un 30% e un 40%” coa aplicación do convenio provincial.

O pasado luns día 18 de febreiro a dirección de La Voz de Galicia presentaba ao Comité Intercentros unha "Plataforma de Negociación" que pretende unha redución de salario do 12,5% e a ruptura do compromiso de mantemento do emprego estabelecido no convenio vixente. Ante isto, máis de 160 traballadores/as das distintas delegacións reuníanse en asemblea este domingo para valorar unha proposta que a sección sindical da CIG denuncia que está “inzada de ameazas e ilegalidades”. Ao seu remate concentráronse diante da antiga sede de La Voz de Galicia en Catro Camiños.

Os Comités de Empresa do servizo de limpeza do complexo Hospitalario Universitario de Santiago (CHUS) pecháronse esta mañá na xerencia do Hospital Clínico para reclamar que se facilite un contexto de negociación real do novo convenio colectivo. O peche rematou unha vez que por parte da xerencia se puxeron sobre a mesa varios compromisos.

O pasado luns un grupo de vixiantes de seguridade privada iniciaba o Camiño de Santiago, desde o Cebreiro. Unha ‘marcha pola dignidade’, organizada pola CIG-Servizos, coa que queren denunciar a rebaixa salarial e das condicións laborais que pretende impor a patronal do sector. Malia as adversas condicións meteorolóxicas contra as 17:00 horas deste sábado 26 de xaneiro chegarán a Compostela, onde teñen previsto facer unha chourizada popular, á que convidan a toda a veciñanza de Compostela

Membros do comité de empresa de Povisa pecháronse hoxe na delegación da Xunta en Vigo para denunciar o bloqueo do convenio colectivo e a intención da empresa de precarizar aínda máis as condicións laborais dos empregados/as. Axentes da Policía autonómica desaloxáronos pouco tempo despois sen que se rexistrasen incidentes e a pesar de que non foron recibidos/as por ningún responsábel da Xunta.

Os traballadores/as de Vitrasa decidiron esta mañá en asemblea suspender a folga indefinida iniciada hai 10 días e aceptar o preacordo alcanzado entre a empresa e o comité tras máis de 14 horas seguidas de negociación. Os empregados/as da concesionaria do transporte municipal de Vigo aceptaron finalmente un pequeno incremento na xornada laboral pero lograron fixar unha paga consolidable de 300 euros para 2012 e de 250 en 2013. Ao mesmo tempo, conseguiron os dous descansos semanais e introduciron a cláusula da ultractividade.

A CIG-Servizos, xunto con CCOO e UGT, vén de iniciar mobilizacións para presionar á patronal coa fin de desbloquear as negociacións dos convenios de comercio vario, comercio alimentación, téxtil e hostalería. O secretario nacional, Paulo Rubido, alerta de que a vixencia destes convenios remata en xullo e que, coa reforma laboral,  a partir de aí “van perder eficacia, poden perder a súa ultraactividade e, polo tanto desaparecer”. A consecuencia inmediata podería ser a perda dos dereitos salariais, laborais e sociais conseguidos nos últimos anos.