A CIG-Metal ten convocado unha folga o luns 19 de outubro no sector do Metal sen convenio propio, na comarca de Vigo e nos concellos de área metropolitana, desde as 9 horas e durante as próximas cinco horas laborais na quenda da mañá e nas catro primeiras horas da quenda da tarde. O motivo desta convocatoria é a celebración do xuízo a trece traballadores do Metal detidos na folga do ano 2006 na carga da Estación de Renfe, con petición de penas de cadea para catro traballadores superiores a tres anos e medio. Para o resto as penas achéganse aos tres. Ademais a negociación do convenio do Metal continúa sen avanzos, e só coa presentación dunha proposta por parte dos mediadores, na que hai escasas diferenzas respecto á presentada antes das vacacións do verán, que fora rexeitada no seu momento e que non se considerara suficiente polo conxunto dos traballadores do sector, polo que naquel momento se continuou coa convocatoria de folga até comezos de xullo.

Coincidindo cunha nova reunión entre patronal e sindicatos na Mesa de Negociación do Metal de Pontevedra, a CIG realizou un chamamento a todos os traballadores e traballadoras do sector para que secunden a xornada de folga convocada o vindeiro día 19, con motivo da celebración do xuízo a trece compañeiros que participaron na folga do ano 2006. Así mesmo, os días 20 e 21 de outubro a CIG-Metal desenvolverá concentracións de delegados e delegadas de todos os sectores.

A asemblea de delegados e delegadas do Metal da comarca de Vigo mantivo o xoves 8 de outubro unha xuntanza para analizar tanto a situación da negociación colectiva do convenio provincial do Metal da provincia de Pontevedra, como a celebración os próximos 19, 20 e 21 de outubro do macroxuízo contra 13 traballadores do sector, que foran detidos na folga do 2006 despois da brutal carga na estación de Renfe. Esta asemblea decidiu convocar folga parcial nas empresas afectadas pola negociación do convenio provincial para o luns 19 de outubro na comarca de Vigo, asi como concentración de delegados e delegadas de toda a provincia da CIG para as dúas xornadas seguintes do xuízo.

CIG-Metal vén de editar outra folla informativa sobre a situación da negociación colectiva que será repartida entre os traballadores e traballadoras afectadas polo convenio provincial do Metal de Pontevedra. Outros temas como a celebración do macroxuizo contra 13 traballadores do sector polo convenio do 2006 ou as sancións ou a contratación son algunhas das cuestións que se abordan neste texto, que reproducimos a continuación

Comezou a última semana de setembro coa volta á negociación no convenio provincial do Metal de Pontevedra, cunha xuntanza coa Patronal, a presenza dos mediadores, da superdelegada de Vigo e das tres centrais sindicais. Esta reunión non durou máis de hora e media e só foi unha nova declaración de intencións das partes, que coincidiron en sinalar a necesidade dun acordo, na que non houbo avanzos.

O 24 de setembro desde as dez da mañá tivo lugar no local sindical da CIG de Vigo unha asemblea de delegados e delegadas do Metal despois do verán e para analizar e debater a situación do conflito pola negociación do convenio provincial, entre outros temas máis, como a represión a través das numerosas multas e sancións administrativas, ou o xuízo que se celebrará do 19 ao 21 de outubro pola carga policial no conflito do metal polo convenio do 2006.