O mércores 13 de maio volvian rachar as negociacións do Convenio do Metal da provincia de Pontevedra, e é que de novo a Patronal deste sector, excusándose nas mobilizacións dos traballadores dos estaleiros contra a contratación irregular no naval desa xornada, volvía abandonar a mesa, na que sempre presentaron as mesmas propostas, cun convenio para dous anos e perda de poder adquisitivo para os traballadores. A CIG-Metal, neste contexto, considera que é "moi importante volver dar unha mostra de forza e convocar novas medidas de presión para facer que esta situación cambie e volvamos a situarnos nun marco de negociación favorábel para os intereses dos traballadores e traballadoras do Metal da provincia de Pontevedra".

Nova semana para a negociación do Convenio do Metal na provincia de Pontevedra, que desta volta comezou na Delegación da Xunta, e con mediación institucional, mais que o martes e o mércores volveu ao Hotel Samil, sen presenza das Administracións. Aínda que formalmente se desbloquearan as negociacións, a Patronal do Metal continúa firme nas súas posturas de convenio para dous anos e contención salarial. Desde a CIG critícase a "intransixencia" da Patronal, e anuncian novas medidas conxuntas de presión senón se producen avanzos reais na mesa de negociación.

Os traballadores/as do convenio do Metal da provincia de Pontevedra deron nesta xornada do 6 de maio unha nova mostra de forza e dignidade apoiando a primeira xornada da folga de 48 horas convocada polas centrais sindicais, e amosando nas rúas a súa vontade de continuar a loitar nestes tempos de crise pola negociación do seu convenio. Os tradicionais piquetes nas distintas zonas industriais desde primeira hora da mañá transformáronse ao longo do dia en multitudinarias marchas, que, na cidade de Vigo, encheron rúas, prazas e avenidas do centro, visibilizando a potencia do Metal, unha vez máis.

O xoves 30 de abril os tres representantes sindicais na Mesa Negociadora do Convenio presentaban no Rexistro da Xunta de Galiza a convocatoria de dúas xornadas de folga para todo o sector do Metal na provincia de Pontevedra para o mércores 6 de maio e o xoves 7 de maio. Miguel Malvido, secretario nacional da CIG-Metal, criticou o desinterese da nova administración galega polo conflito aberto coa negociación do convenio colectivo do Metal para a provincia de Pontevedra, por non asumir 'o seu papel de mediadora' no devandito conflito.

O mércores 29 de abril daba comezo unha nova xornada de loita pola negociación do convenio do Metal da provincia de Pontevedra, que se concretaría con asembleas nos estaleiros, marchas pola cidade e que rematou cunha asemblea na Praza do Concello de Vigo. Despois de que o martes 28 de abril tivera lugar unha nova xuntanza da Mesa Negociadora do Convenio, na que non se avanzou en nada, decidiase dar paso á acción e realizar unha paro desde as once da mañá até as tres da tarde nos centros de traballo do Naval da provincia de Pontevedra. Ademais, decidiuse convocar dúas novas xornadas de folga para a próxima semana e que afectarán a todo o sector do Metal da provincia.

Este martes 28 de Abril acadábase a sexta xornada do peche na Delegación de Traballo en Vigo da parte sindical da Comisión Negociadora do convenio provincial do metal en Pontevedra. Na tarde de hoxe producíase unha nova xuntanza da mesa de negociación coa patronal, na que os representantes dos traballadores/as agardaban avances de cara a un acordo para o convenio, aínda que tamén advertían que no caso contrario as mobilizacións ían sufrir un incremento na súa intensidade.