Os secretarios xerais do sindicato vasco ELA e mais da CIG, Adolfo Muñoz “Txiki” e Suso Seixo, anunciaron hoxe a presentación dunha querela criminal ou, no seu caso, unha demanda penal, contra os responsábeis políticos dos gobernos e o gobernador do Banco de España, Miguel Ángel Ordoñez, pola súa responsabilidade na grave situación financeira do Estado español.

A Asemblea de desempregados e desempregadas organizados a través da CIG de Ferrol presentou esta mañá publicamente os seus obxectivos e programa de acción. Constituída con vocación de sumar apoios e alentar a mobilización entre os/as traballadores/as sen emprego, a asemblea organízase baixo a consigna “non me chames  parado@... son desempregad@ en risco de exclusión social” e ten convocada un acto aberto para o vindeiro martes 17 de abril, ás 17:00 horas, nos locais da central sindical.

O número de desempregados/as rexistrado en Galiza volveu acadar en marzo un novo máximo histórico ao sumar 2.120 parados/as máis, chegando así até as 276.795 persoas, segundo datos ofrecidos hoxe polo Ministerio de Emprego. Diante desta gravísima situación, a CIG reitera a súa crítica ás medidas de austeridade e control do déficit público practicadas polos diferentes gobernos, que provocan unha destrución acelerada do emprego, e demanda o incremento do investimento público e un apoio decidido aos nosos sectores produtivos.

Os traballadores da construción e industrias afíns levan padecendo os efectos da crise económica dende o seu inicio. Son moitos os milleiros de familias que malviven sen ningún tipo de ingreso ou cobrando unha prestación asistencial, conxelada en 426,01 € como consecuencia da non subida do SMI por parte do Goberno do PP. No ano 2007 traballaban na construción, madeira, pedra ou derivados do cemento en Galiza 188.264 persoas (147.062 asalariadas e 41.202 autónomas); en febreiro de 2012 as cifras caían a 107.085, destruíndose por tanto 81.179 postos de traballo.

Centos de persoas participaron esta tarde nas concentracións simultáneas convocadas pola CIG nas cidades galegas e en varias vilas do país en contra da agresiva reforma laboral aprobada recentemente polo Goberno español do Partido Popular. As mobilizacións, que se desenvolveron en 19 localidades galegas, forman parte da campaña que está a levar a cabo a central nacionalista para aglutinar forzas de cara a dar unha contundente e masiva resposta na folga xeral do xoves 29 de marzo.

A CIG ten convocadas para hoxe, xoves 22 de marzo, concentracións simultáneas nas cidades galegas e en varias vilas do País en contra da agresiva reforma laboral aprobada recentemente polo PP e para aglutinar forzas de cara a dar unha contundente e masiva resposta na folga xeral do xoves 29 de Marzo. Con estas concentracións a central sindical pretende tamén trasladar aos gobernos español e galego o rexeitamento que existe nos centros de traballo a respecto desta brutal e regresiva reforma laboral. Unha reforma laboral que ten a dimensión dun golpe de estado e vén acabar cos poucos dereitos laborais que a clase traballadora conquistou nas últimas décadas.

Arredor duns 50 delegados e delegadas da CIG de Ferrol iniciaron este mediodía un peche na Casa do Concello en protesta polas medidas contra a clase traballadora aplicadas polos gobernos galego e español –nomeadamente á lesiva reforma laboral-, así como demandar actuacións e medidas urxentes de carácter socioeconómico para reactivar os sectores produtivos da comarca e garantir uns servizos públicos gratuítos e de calidade.