Desde as dez da mañá no Salón de Actos dos Capuchinos da cidade de Vigo tiña lugar unha asemblea de delegados e delegadas da central sindical nacionalista nesta comarca. Nesta xuntanza interviron o secretario comarcal da CIG de Vigo, Serafín Otero, o secretario confederal de Negociación Colectiva da CIG, Antolín Alcántara, e Antonio Iglesias, secretario comarcal da CIG-Saúde de Vigo. Presentaron a campaña e contido do 1º de maio deste ano, e realizaron un chamamento a unha participación masiva nesta mobilización. Tamén se tratou a cuestión da reforma laboral e as mobilizacións na defensa da sanidade pública, na defensa dos Servizos Sociais e contra o peche do Hospital da Cruz Vermella nesta cidade.

O persoal e os familiares das seis persoas que aínda permanecen ingresadas iniciaron na mañá deste martes un peche indefinido no hospital da Cruz Vermella de Vigo para evitar o traslado dos doentes e o peche definitivo do centro. Os traballadores e traballadores tiñan intención de trasladar hoxe as súas reivindicacións até a dirección provincial do Sergas, mais atopáronse cun dispositivo policial que lles impediu acceder ao edificio.

O Comité de empresa e os familiares dos pacientes do Hospital da Cruz Vermella de Vigo reiteraron esta mañá o rexeitamento ao peche do centro decretado pola ONG e reclamaron ao Sergas e ao Concello de Vigo que abran negociacións coa organización de cara a acadar un novo concerto que evite a destrución de 70 postos de traballo e deixe sen a atención axeitada a outros 70 doentes. O persoal, que esta semana manterá unha nova xuntanza coa representación da Cruz Vermella, mobilizarase mañá martes e ten convocada unha manifestación cidadá para o vindeiro 22 de abril.

Os traballadores e as traballadoras do hospital da Cruz Vermella de Vigo trasladaron na mañá deste mércores as protestas contra o peche do centro até a sede da organización en A Coruña, onde desenvolveron unha ruidosa concentración para esixir o mantemento do servizo. Dende a CIG lémbrase que non existen causas económicas que xustifiquen a decisión desta organización e reclamouse ao Sergas que actúe de inmediato para evitar un peche que deixará na rúa a 70 traballadores/as e a 70 doentes, que requiren de atención permanente.

O persoal da Cruz Vermella de Vigo segue a mobilizarse en contra do peche do hospital e a eliminación de 70 postos de traballo. Nesta ocasión as traballadoras e traballadores concentráronse encadeados na praza dos cabalos o venres 12 de marzo de 12 a 13h. Posteriormente se dirixiron ao Concello para seguir coas súas protestas.

A Secretaria da Muller da CIG de Vigo decidiu convocar unha concentración na data do 8 de marzo, dia Internacional da Muller Traballadora, diante do Hospital da Cruz Vermella, na rúa Cánovas del Castillo, ás 12.30 para amosar a solidariedade co persoal deste centro sanitario, que son na súa imensa maioría mulleres traballadoras.

O persoal da Cruz Vermella segue coas mobilizacións para rexeitar o peche do hospital, nesta ocasión o mércores 3 de marzo concentráronse diante do edificio da Xunta e posteriormente encadeáronse diante da Dirección Provincial do SERGAS.