Os traballadores e traballadoras do Grupo Fricosa afectados/as polo impagamento das indemnizacións por despedimento proseguen co calendario de mobilizacións para reclamar ao empresario que faga fronte ás súas obrigas legais. Un grupo de empregados/as realizaron unha nova concentración ás portas do matadoiro de Almeiras na mañá deste venres, mentres que outro grupo repartiu folletos informativos explicando a súa problemática por Santa Cristina, lugar de residencia dos empresarios.

Un grupo de ex traballadores/as do matadoiro de Almeiras iniciaron na mañá deste mércores un calendario de mobilizacións para demandar do propietario de Fricosa que abone as contías pendentes correspondentes ás indemnizacións pola extinción de contratos. Os empregados/as teñen intención continuar as protestas diante das instalacións de Culleredo até que os pagamentos se fagan efectivos.

O Comité de FC-Alimentación (do grupo Conchado) denunciou a “ilegal e fraudulenta actuación” da dirección de empresa, que hoxe, venres 25 de febreiro, fixo entrega do listado de traballadores/as que integran o que a empresa entende que é o calendario de vacacións para 2011.

Os traballadores e traballadoras de FC-Fricosa están desenvolvendo este martes unha nova xornada de folga no matadoiro, seguida pola práctica totalidade do cadro de persoal, en contra do expediente de regulación de emprego e o peche da sección de maquila. Ademais, dentro do calendario de mobilizacións previstas, o persoal realizou unha manifestación esta mañá polas rúas de Culleredo que mantivo colapsada a circulación do tráfico durante algo máis de hora e media.

O persoal do matadoiro de F.C. Alimentación-Frigoríficos Conchado, S.A. (Fricosa) en Culleredo continuaron esta mañá co calendario de mobilizacións acordado en contra do ERE de extinción e o peche das seccións de matanza e despece. Nesta ocasión, e coincidindo coa xornada de folga convocada entre as 08:00 e as 14:30 horas, os traballadores e traballadoras levaron as súas protestas até as portas da Oficina Principal do Banco Pastor, xa que esta entidade está pondo trabas para a refinanciación da débeda da empresa e polo tanto dificultando o actividade normal no matadoiro.

O Comité de FC-Fricosa vén de denunciar a total falta de vontade negociadora da empresa, que mesmo se opuxo a manter aberto os dous períodos de consulta das dúas sociedades mercantís até que remate o tempo legalmente estabelecido. Así mesmo, a dirección rexeitou todas as alternativas trasladadas pola representación dos traballadores/as de cara a evitar despedimentos no matadoiro e adiantou que non existen garantes de que o persoal cobrará as indemnizacións correspondentes. Diante desta situación, o Comité mantén a convocatoria de novas xornadas de folga para o venres 26 de novembro e o martes 30, días nos que tamén realizará mobilizacións.

O persoal do matadoiro de Fricosa en Culleredo desenvolveu este venres a segunda de xornada de paros e concentracións para rexeitar o expediente de regulación de emprego presentado pola empresa, así como a súa intención de pechar a cadea de matanza e despece. Ademais, trasladaron unha solicitude aos grupos da Corporación local para que aproben, no próximo pleno municipal, unha moción de apoio á súa loita e polo mantemento de todos os postos de traballo.