Diante da presentación dos resultados da auditoría a Caixa Galicia e Caixanova, presentado esta mañá pola conselleira de Facenda, e á espera de coñecer o contido da mesma, a CIG solicitou a apertura inmediata dun proceso de negociación destinado a minimizar o impacto sobre o emprego que vai supor a fusión das dúas entidades, así como para homologar e garantir as condicións laborais do persoal. Dende a CIG tense denunciado que o persoal das caixas de aforros deberá asumir as consecuencias dunha xestión cuestionábel por parte das direccións, ante as que tamén se esixirán medidas.

A CIG de Ferrol criticou a actuación da Xunta da Galiza, quen, o pasado 31 de decembro, pechou as instalacións da Casa do Mar e rematar o contrato coa empresa Esabe, deixando deste xeito na rúa aos cinco traballadores encargados dos servizos de seguridade e mantemento das instalacións. Dende a Federación de Servizos, cualificouse de “tomadura de pelo” esta medida e reclamouse ao goberno galego a reapertura das instalacións e a continuidade do proxecto para habilitar na Casa do Mar un Centro de Día para enfermos de Alzheimer.

Os traballadores e as traballadoras de Pascual continuaron co calendario de mobilizacións o pasado sábado 7 de novembro. Desta volta, desenvolveron unha manifestación polas rúas do concello de Outeiro de Rei na que participaron unhas 1.000 persoas que exixiron á Xunta unha solución ao conflito que evite o peche da factoría e a perda dos postos de traballo, así como información clara sobre os proxectos presentados polas empresas interesadas en adquirir a factoría.

No medio do intenso debate sobre o futuro das Caixas de Aforro galegas e as posíbeis saídas, a CIG vén de presentar un informe sobre o impacto que tería a hipotética fusión de Caixa Galicia e Caixanova sobre o emprego. Os datos tirados do documento revelan que a medida crearía un excedente de persoal que superaría os 1.500 traballadores e traballadoras en Galiza, sen contar a incidencia sobre os postos indirectos nin os centros do resto do Estado. Fronte a estes resultados, a CIG quere deixar moi claro que non vai tolerar nin un só despedimento derivado dunha fusión, realizada ademais en termos políticos e obviando a participación das organizacións sindicais neste proceso.

A CIG-Servizos de Ferrol vén de denunciar publicamente que os nove traballadores de Los Lebreros destinados ao servizo de hostelaría do Arsenal Militar teñen quedado sen emprego e sen cobrar as tres últimas nóminas, logo de que rematese a contrata do Ministerio de Defensa coa empresa gaditana. Dende a CIG reclámase á administración que achegue unha solución, xa que era coñecedora das prácticas da compañía, así como da situación que padecían os traballadores/as.

A Sección Sindical da CIG no BBVA retomou as mobilizacións en protesta contra o proceso de reconversión e destrución de emprego que a entidade está levando a cabo e que significou o peche de 15 oficinas en Galiza e a perda de 140 postos de traballo dende xaneiro de 2008 ata marzo de 2009. A primeira destas accións tivo lugar o na mañá do xoves 18 de xuño diante da oficina de BBVA en Lalín.