A CIG desenvolveu esta mañá unha concentración de delegados e delegadas para “lembrar” que o Decreto do Carbón é un problema que continúa pesando sobre o futuro da produción enerxética galega, a pesar de que nestes intres estea paralizada a súa aplicación por orde xudicial. A central sindical continúa así as mobilizacións contra este novo veto político a Galiza, iniciadas xa o pasado mes de xullo.

Arredor de 6.000 persoas participaron este domingo na manifestación convocada en Ferrol contra o Decreto do Carbón, na defensa da produción enerxética galega e dos máis de 3.000 postos de traballo dependentes da actividade das centrais de As Pontes e Meirama. A marcha, que saíu dende a Praza de España baixo unha intensa choiva, rematou cunha concentración diante da Praza de Armas, onde a actriz Mercedes Castro deu lectura a un manifesto denunciando as consecuencias do decreto para Galiza e demandando ao goberno estatal que poña en funcionamento de xeito urxente a anunciada “comisión de seguimento”, co obxecto de que “nun prazo moi inferior aos seis meses” o decreto estea modificado e non sexan as centrais galegas as únicas prexudicadas pola cota política a favor da hulla española.

A CIG anima a todos os galegos e galegas a participar na manifestación do vindeiro domingo 24 de outubro, en Ferrol, en contra do Decreto do Carbón e polo dereito a producir e a traballar na nosa terra. A marcha sairá ás 12:00 horas dende a Praza de España e rematará cunha concentración na Praza de Armas, onde se procederá a lectura dun manifesto. Dende a central nacionalista agárdase que este convocatoria se converta nunha gran demostración do rexeitamento social ao Real Decreto que faga mudar da súa posición ao goberno español.

A CIG continúa este xoves coas protestas en contra do Decreto do Carbón e pola defensa dos postos de traballo que dependen da actividade das centrais de Meirama e As Pontes. Os compañeiros Fernando Branco e Alberte Amado proseguen adiante coa folga de fame iniciada o pasado sábado 16 de outubro, na espera dunha contestación por parte do Ministerio á solicitude de xuntanza cursada pola central sindical. Ambos compañeiros aseguraron sentirse “perfectamente” e con ánimos abondos para continuar adiante coa súa loita. Pola súa banda, o Comité de Meirama, Sabón e delegados das empresas auxiliares realizaron unha nova marcha, nesta ocasión até o Concello de Arteixo, en contra deste Real Decreto.

A Executiva Confederal trasladou na mañá deste martes 19 de outubro o apoio da central sindical aos dous compañeiros que dende o pasado sábado están en folga de fame para demandar unha xuntanza co Ministro de Industria, a fin de buscar unha saída ás graves consecuencias que terá para Galiza a entrada en vigor do Decreto do Carbón. Os/as membros da Executiva acordaron manter a súa xuntanza semanal no local da CIG en As Pontes para arroupar así a Fernando Branco e Alberte Amado e reclamar ao goberno estatal a retirada da normativa, ou cando menos, que se modifique o decreto atendendo a proposta concreta achegada pola central nacionalista.

O pasado sábado 16 de outubro, o delegado da CIG en Endesa, Fernando Branco, e o responsábel da Unión Local da CIG de As Pontes, Alberte Amado, iniciaban unha folga de fame para demandar unha reunión urxente co Ministro de Industria, co obxecto de analizar as consecuencias para Galiza da aplicación do Decreto do Carbón, así como reclamar unha modificación do mesmo que evite o total paralización das centrais de Meirama e As Pontes. A decisión de incrementar as medidas de presións chegou logo de que o goberno estatal non respondese a petición da CIG e ante a previsíbel entrada en vigor do decreto en tan só uns días. Non obstante, dende a central sindical advírtese que as accións reivindicativas non cesarán “porque a CIG non vai permitir un novo Astano”.

Máis de 3.000 persoas participaron o pasado venres 8 de outubro na manifestación convocada en As Pontes contra o decreto do carbón e na defensa dos postos de traballo dependentes da actividade da central térmica. A marcha, convocada pola Plataforma contra o decreto do carbón, foi unha nova mostra do rexeitamento social que esta normativa, que discrimina a produción eléctrica galega en favor doutras centrais do estado, suscita tanto entre os traballadores/as afectados/as como na cidadanía en xeral.