CIG-Banca vén de facer pública unha nova proposta da dirección de Novagalicia Banco que mellora levemente as indemnizacións do persoal afectado polo peche de oficinas fóra de Galiza, pero empeora as indemnizacións das baixas e aumenta os recortes salariais. A federación advirte que o que se pretende é impor despedimentos e recortes aproveitando a reforma laboral. Por iso chama a participar nas manifestacións que a central sindical ten convocadas para o 10 de marzo en todas as cidades galegas e a sumarse á folga xeral do vindeiro 29 de marzo.

O Comité de Sykes Enterprises vén de iniciar un calendario de mobilizacións en rexeitamento ás pretensións da empresa de despedir a 165 traballadoras/es da plataforma da Coruña, aproveitando as facilidades da reforma laboral. O persoal realizou unha concentración ás portas da empresa entre as 14:30 horas e as 15:30 horas deste mércores e mañá está convocada unha nova protesta por parte da CIG, a partir das 12:00 horas.

O Comité de Sykes quere manifestar publicamente o seu máis firme rexeitamento ás pretensións da dirección de despedir a 165 traballadores/as da plataforma da multinacional na Coruña. Esta medida efectivizaríase, segundo comunicou á empresa, a través do despedimento de 81 traballadores/as eventuais e coa aplicación dun ERE de extinción para outros 84 empregados/as fixos/as, baixo as condicións estabelecidas na nova reforma laboral.

Persoal de novagalicia banco concentrouse en Ourense para demandar a readmisión dun compañeiro inxustamente despedido. Previamente tivo lugar unha asemblea para explicar o despedimento inxusto do compañeiro, a situación da negociación do novo ERE para 800 persoas, o impacto laboral da reforma laboral e como preparación cara a FOLGA XERAL  do 29 de marzo.

O persoal da empresa concesionaria do servizo de limpeza da Universidade de Santiago, Clece, acordou por unanimidade, na asemblea celebrada o pasado venres día 24 de febreiro, suspender as mobilizacións e iniciar negociacións coa contrata, logo de que esta anunciara a súa intención de retirar o ERE. A primeira xuntanza deste novo período de conversas celébrase esta tarde.

A empresa ourensá COMESCOR (Componentes Metalúrgicos Orensanos S.L.) adebeda aos seus 23 traballadores 6 mensualidades. Presentou concurso de acredores e un ERE extintivo que de saír adiante deixará no paro a todos agás o xerente, dous encargados e dous traballadores de oficina. Aseguran que durante este tempo, aínda que si houbo certa diminución, mantívose a carga de traballo, pero denuncian que, por algunha razón, os encargos cobrábanse por debaixo de custo. Desde o 17 de febreiro están en folga indefinida, facendo gardas diante da nave, para evitar que se saque o ferro que está dentro.

A Sección Sindical da CIG en Alcoa quere reiterar que non participa na sinatura do acordo do ERE para a planta da Coruña porque non recoñece as causas económicas e produtivas achegadas pola dirección na documentación do expediente e nas que basea esta medida. Os delegados da CIG tampouco poden aceptar o Plan de Acompañamento Social do ERE porque non quedan recollidas garantías do mantemento do emprego nin da continuidade da actividade da fábrica.