O pasado 30 de outubro publicábase no BOE o Real Decreto 1483/2012, de 29 de outubro, no que se desenvolve o procedemento de despedimento colectivo a aplicar nas administracións públicas (Real Decreto 1483/2012, de 29 de outubro).  Unha medida aprobada polo goberno do PP á que a Área Pública da CIG (CIG-Administración, CIG-Ensino e CIG-Saúde) manifesta a súa máis rotunda oposición, porque supón acelerar o proceso de desmantelamento dos servizos públicos e provocar unha masiva destrución de emprego. Por iso, fan un chamamento a todas as empregadas/os públicos a sumarse masivamente á folga xeral convocada para o vindeiro día 14 de novembro.

O Tribunal Superior de Xustiza de Galiza vén de declarar “non axustado a dereito” o expediente de extinción de emprego presentado por Arias Hermanos para 28 traballadores/as, xa que non considera probadas as causas económicas e produtivas alegadas pola empresa. A sentenza estabelece que os despedimentos executados son improcedentes e condena a Arias Hermanos a readmitir ao persoal afectado ou a abonarlle unha indemnización de 45 días por ano traballado.

Os traballadores/as da compañía viguesa Berbescon, dedicada á elaboración, transformación e comercialización de produtos derivados do peixe conxelado, volveron percorrer hoxe as rúas da cidade en manifestación para denunciar os incumprimentos da empresa e reclamar o pago dos salarios pendentes. A marcha rematou fronte á Inspección de Traballo, onde representantes sindicais e do comité de empresa mantiveron unha xuntanza co seu responsábel.

Traballadores/as de Maessa, empresa auxiliar de Navantia, concentráronse este venres diante do estaleiro de Ferrol en solidariedade coa situación que están a vivir dez compañeiros afectados por un ERE de extinción, aos que o servizo público de emprego non lles recoñece o dereito a cobrar a prestación por desemprego, porque a Inspección de Traballo emitiu un informe no que cuestiona a validez do ERE. Os traballadores/as realizaron unha concentración e comparecencia aos medios este venres para explicar a situación de indefensión na que se atopan tras 45 días sen traballo e sen poder cobrar o paro.

A CIG saíu hoxe ao paso das últimas informacións aparecidas nos medios de comunicación sobre o sector naval da Ría de Vigo para denunciar a falta de compromiso político da Xunta e do Goberno español cun sector fundamental para a comarca e estratéxico para o conxunto do país. Dende a central nacionalista auguran a desaparición da industria auxiliar se antes de final de ano non se establece un novo sistema de bonificación fiscal e se creen mecanismos para que as empresas poidan optar a financiamento.

Os traballadores/as da empresa Hermanos Rodríguez Gómez de Vigo levan xa máis dun mes en folga para reclamar o pago dos máis de sete meses de salarios que se lles adebeda. Dende hai varias semanas manteñen vixiadas as instalacións da compañía, no peirao de Bouzas, en quendas de 24 horas para evitar a saída de material, mentres que para o luns teñen convocada unha nova manifestación.

Os traballadores de SEMAR afectados polo ERE regresaban este 31 de xullo aos seus postos. Porén, ao chegaren ás portas da nave impedíuselles o acceso. Ás 12:30 horas presentábase na nave a Inspección de Traballo e o propio empresario explicaba que nin ten traballo para eles, nin os quere dentro da nave. A estas alturas séguelles adebedando máis de un mes de salarios.