As traballadoras de Mafecco iniciaron na tarde deste venres o calendario de mobilizacións en contra do ERE de extinción que a empresa pretende levar adiante e que o persoal considera “unha fraude”. A mobilización, que se realizou diante da fábrica ao remate da quenda de traballo, terá continuidade o xoves 21 de xuño, cunha protesta ás portas da Delegación da Consellaría de Traballo no Mercado de Elviña.

As traballadoras e traballadores de Mafecco expresaron, durante a asemblea xeral celebrada esta tarde, o seu unánime e total rexeitamento aos 42 despedimentos que pretende acometer a empresa por entender que carecen de calquera tipo de xustificación e, ao mesmo tempo, trasladaron a súa sorpresa ante a proposta de ERE de extinción, tendo en conta o intenso ritmo de traballo que vive a fábrica ante incremento da carga de traballo.

O Comité de Mafecco e a CIG queren amosar o seu rexeitamento ás intencións da dirección da empresa de téxtil de levar adiante un expediente de extinción de emprego que afectaría a máis do 50% do cadro de persoal da fábrica de Sabón (42 traballadoras/es dun total de 78). Estes despedimentos carecen de calquera xustificación e supoñen unicamente un alarde de prepotencia e “chulería” por parte da dirección, que se acolle á permisividade que lle outorga a regresiva reforma laboral para executar os despedimentos.

Os membros do consello de administración e de alta dirección da empresa Adolfo Domínguez recibiron 981.000 euros no ano 2011, o que supón un aumento do 2,4% respecto ó ano anterior, segundo os datos facilitados á Comisión Nacional do Mercado de Valores. Seis conselleiros recibiron 763.000 euros, fronte aos 758.000 do ano 2010, e tres persoas que forman parte da alta dirección, pero non son conselleiros executivos, obtiveron unha retribución de 218.000 euros fronte aos 200.000 do ano anterior.

O comité de empresa de Adolfo Domínguez está a levar a cabo un calendario de mobilizacións para rexeitar o ERE que afecta a 50 traballadores/as e a rebaixa salarial do 5% propostos pola dirección. Dende a CIG denuncian que o empresario está a aplicar toda a agresividade da reforma laboral contra uns empregados/as que na súa maioría non superan o Salario Mínimo Interprofesional (SMI).

A Unión Comarcal da CIG de Ourense vén de constatar que no que vai de 2012 os Expedientes de Regulación de Emprego (ERE) aumentaron un 54,5% con respecto ao mesmo período do ano anterior. Deste xeito, dende xaneiro a xuño rexistráronse un total de 34, mentres que no mesmo período en 2011 foron 22.

Corenta e un traballadores da empresa ‘Francisco Gómez e Cia’, quedarán na rúa logo de executarse o ERE aprobado unilateralmente pola empresa e que foi xustificado en previsión de perdas futuras. Este martes, os traballadores, apoiados por representantes da CIG-Construción, concentrábanse diante das instalacións do grupo en Touro.