A Fundación Moncho Reboiras-Fesga vén de publicar unha entrevista en vídeo con Pablo Micheli, secretario xeral da Central de Traballadores da Arxentina (CTA), que visitou Galiza recentemente convidado pola Confederación Intersindical Galega.

A FESGA e Galiza Nova veñen de organizar unha conferencia que será presentada polo secretario xeral da CIG,  Suso Seixo, baixo o título “Movementos sociais e construción do poder popular. Unha ollada dende América Latina”. A charla correrá a cargo de Isabel Rauber, doutora en Filosofía e investigadora dos movementos sociais e terá lugar o vindeiro xoves día 15 de decembro, ás 20:00 horas, na aula 0.2 da facultade de Ciencias Políticas, no Campus Sur de Compostela.

O padroado de FESGA, fundación presidida polo Secretario Xeral da CIG, Suso Seixo, acordou o pasado 15 de abril, a proposta do Consello Confederal da central sindical, pasar a denominarse Fundación Moncho Reboiras para o Estudo e a Divulgación da Realidade Social e Sindical de Galiza. Para o cambio de denominación seguíronse todos os trámites legalmente estabelecidos e contouse coa aprobación da familia.

A Fundación para o Estudo e Divulgación da Cuestión Social e Sindical en Galiza (FESGA) vén de publicar na súa páxina web as dúas primeiras entregas da serie "Coñece Galiza", baseada en percorridos histórico-turísticos pola nosa xeografía. Os vídeos documentais, de 15 minutos de duración, veñen acompañados por un caderno despregábel. Estes materiais pretenden vincular o desenvolvemento urbano a procesos históricos, económicos e sociais.

O “Acordo Social e Económico” ten como principal obxectivo o trasvase de rendas derivadas do traballo cara o capital privado a través dunha serie de medidas que reducen a cuantía das pensións, aumentan a idade de xubilación de 65 a 67 anos e ampliación do período de cálculo de 15 a 25, entre outras. Para Antolín Alcántara, secretario de negociación colectiva da CIG e un dos entrevistados nesta video-reportaxe, este acordo pretende “desmobilizar e desmotivar a clase traballadora”, ademáis de verificar o papel de CCOO e UGT como axentes colaboradores do sistema e lexitimadores dos recortes sociais e laborais.

A Fundación para o Estudo e Divulgación da Cuestión Social e Sindical en Galiza (FESGA), presenta unha entrevista co secretario nacional da CIG-Banca sobre o futuro ao que se enfronta Novacaixagalicia trala ameaza de bancarización xerada polas esixencias formuladas polo Goberno español. A FESGA ofrece tamén un traballo sobre a loita dos galegos a prol da independencia da Arxentina en 1806 e os trece últimos números do boletín EIXO como voceiro da ING, editados no período entre xaneiro de 1979 e setembro de 1980.

A Fundación para o Estudo e Divulgación da Cuestión Social e Sindical en Galiza (FESGA) vén de publicar na súa páxina web unha vídeo-entrevista con Olaia Fernández Davila, ex-dirixente do sindicalismo nacionalista e parlamentaria do BNG no Congreso dos Deputados estatal, na que se aborda o debate da reforma das pensións no parlamento español e na comisión do Pacto de Toledo. A fundación da CIG tamén pon a dispor das persoas interesadas un traballo audiovisual sobre a revolución bolivariana e o poder obreiro en Venezuela, así como novos documentos arredor do Directorio Revolucionario Ibérico de Liberación (DRIL).