A CIG de TRALUSA (empresa adxudicataria do transporte urbano de Compostela) denuncia que a reestruturación das liñas do transporte urbano vai favorecer a amortización de 5 cinco postos de traballo. Os representantes da central sindical denuncian tamén que esta reestruturación supón a ampliación dos traxectos, en varias das liñas, sen que se modifiquen as frecuencias, o que imposibilita, na práctica, o cumprimento das mesmas. Para a CIG é inadmisíbel que, para cumprir os horarios, se lle estea requirindo aos traballadores que fagan o que sexa necesario.

Un xuíz de Palencia ordenou o precintado da fábrica onde a familia Ruiz Mateos viña elaborando os chocolates La Perfección e Viso,despois de que o Tribunal Supremo rexeitase o recurso de casación interposto pola empresa contra a decisión da Audiencia Provincial de Madrid que sinala aos antigos traballadores/es da compañía viguesa que creou as marcas como lexítimos propietarios das mesmas. A sentenza, que tamén fixa unha indemnización, chega cando os ex empregados da compañía comezan os contactos para vender as marcas.

Os secretarios comarcais das federacións de Banca, Administración, Metal, FGAMT e Servizos compareceron hoxe para anunciar a presentación de demandas de conflito colectivo -que se intentará, cando sexa posíbel, facelo coas outras organizacións sindicais- contra as empresas públicas nas que se está a aplicar de forma ilegal o Real Decreto Lei 8/2010 de medidas para reducir o déficit público.

A CIG de Porriño vén de denunciar diante da consellaría de Educación e da Dirección Xeral de Mobilidade graves irregularidades no transporte escolar de escolares e traballadores por parte dun vehículo particular ao servizo das empresas do grupo Monbús. A CIG denuncia que nese vehículo particular, unha persoa que cobra unha pensión de xubilación ordinaria  está a realizar servizos de transporte de persoas para as empresas deste grupo.

As traballadoras e traballadores de Alfageme recibiron a confirmación de que cobrarán a nómina do mes de novembro en plena concentración diante da delegación da Xunta de Galiza en Vigo. Alí chegaran en manifestación tras saír das dependencias da empresa, en Bouzas, onde permaneceran pechadas toda a fin de semana. O persoal da conserveira marcha agora de vacacións pero xa se prevén novas xuntanzas no mes de xaneiro, para valorar posíbeis mobilizacións en función da situación. Aínda se lles adebeda a paga extra de Nadal.

Os 14 traballadores das ambulancias Emersan Galicia, que presta servizo ao Hospital Arquitecto Marcide de Ferrol, están desenvolvendo a segunda xornada de folga para reclamar o cumprimento dos acordos asinados e reclamar ao Sergas que asuma á súa responsabilidade e obrigue a empresa a cumprir coas condicións da contrata. Os traballadores tamén estiveron repartindo follas informativas nas portas do hospital para explicar aos usuarios/as os motivos da folga.

Os traballadores das ambulancias de Emersan Galicia, que atende ao hospital Arquitecto Marcide de Ferrol, veñen de iniciar unha folga indefinida para reclamar á empresa que cumpra o convenio e adopte medidas reais en materia de prevención de riscos e saúde laboral. A folga, que se está desenvolvendo sen incidentes, afecta ao servizo de transporte de doentes do hospital ferrolán.