A CIG quere desmentir rotundamente as cifras achegadas pola Consellaría de Traballo e Benestar e a Consellaría de Industria a respecto da eficacia e a inserción laboral acadadas a través do programa EmpregaTex. Segundo os datos dados pola Xunta, un total de 200 traballadoras e traballadores afectadas/os por EREs no sector do téxtil atoparon emprego grazas ao programa EmpregaTex.

A Confederación Intersindical Galega volveu acadar moi bos resultados nas eleccións sindicais celebradas na compañía pontevedresa Vertifil Industrial, dedicada ao sector téxtil e con sede en Moraña. A CIG obtivo catro representantes no comité de empresa, mentres que a UGT só sumou un delegado/a.

A CIG de Ferrol participou esta mañá nunha nova mobilización convocada pola Confraría de Barallobre contra a decisión da Consellaría do Medio Rural e do Mar de excluír ás mariscadoras a pé do Plan de Dinamización da Ría, alegando motivos de índole económica.

A FGAMT-CIG de Ferrol vén de amosar a súa preocupación polas consecuencias negativas que terá para a comarca a unificación das Consellarías do Mar e do Medio Rural, dada a importancia destes dous sectores para o País e a crítica situación na que se atopa o colectivo de traballadores/as do mar da ría de Ferrol.

Esta mañá celebrábase nos xulgados de Fontiñas, en Compostela, o xuízo rápido pola agresión que a traballadora de Autobuses de Calo, Nélida Pisco, sufriu na nave da empresa por parte do encargado. O xuízo foi finalmente aprazado até o 29 de marzo, a solicitude do avogado da CIG, para que se poidan presentar os informes médicos pertinentes sobre o estado físico de Pisco. Transcorrido tan pouco tempo desde a agresión, aínda non están todos os resultados das probas realizadas, algunhas esta mesma mañá.

O pasado mércores 28 de decembro, o encargado de Autobuses de Calo agredía fisicamente a Nélida Pisco na nave da empresa. A traballadora tivo que ser atendida no centro de saúde, onde se levantou o preceptivo parte de lesións. Mañá martes, día 3 de xaneiro, terá lugar, nos xulgados de Fontiñas, un xuízo rápido pola vía penal. A CIG convoca ás 10:30 horas, unha concentración en repulsa a esta agresión machista diante dos propios xulgados.

A FGAMT-CIG (Federación Galega de Alimentación, Mar, Transportes, Téxtil e Telecomunicacións) vén de denunciar publicamente as neglixentes actuacións detectadas nos últimos tempos nos distintos servizos médicos (especialmente na Inspección Médica e as Mutuas), consistentes en dar a alta laboral a condutores profesionais que están a recibir un tratamento que impide manexar vehículos e maquinaria nas condicións de seguridade adecuadas.