As centrais sindicais CIG, CCOO e UGT non asinaron o venres 5 de decembro, como estaba previsto, o Convenio de Limpeza de Edificios e Locais de Pontevedra. Os tres sindicatos comprometéronse diante da asemblea de traballadores e traballadoras, celebrada no concello de Vigo a asinar o acordo do 27 de novembro, mais as centrais sindicais enviaron un comunicado de imprensa para clarificar a situación do convenio xa que "o que non sabiamos é que a Patronal da Limpeza volve unha vez máis a interpretar os acordos como lle convén".

Logo de 12 días de paro indefinido, a folga do convenio provincial de limpeza de edificios e locais de Pontevedra quedou desconvocada. Centrais sindicais e patronal chegaron a un pre-acordo que foi ratificado polas asembleas de traballadores. A proposta aceptada contempla a sinatura dun convenio colectivo para os vindeiros tres anos e inclúe un incremento salarial de 30 euros o primeiro ano e 40 euros para cada un dos outros dous. Ademais, estabelécese unha cuarta paga de 60 euros. A antigüidade pasa a computarse por cuadrienios, no canto de trienios.

Décimo dia de folga para as traballadoras da limpeza de edificios e locais na provincia de Pontevedra, que levou a agudizar o enxeño, e apurar novas accións. En Vigo, e diante da abafante presenza de antidisturbios, que obstaculizaron en todo momento o labor dos e das piquetes, decidiron coller un barco e achegarse até Cangas, para manifestarse nesta vila. En Pontevedra volvían ocupar de novo un edificio da administración, e recuncaban no edificio de Presidencia da Xunta, na rúa Benito Corbal, onde permaneceron pechadas até case as nove da noite.

As tres centrais sindicais convocantes da folga indefinida na limpeza de edificios e locais da provincia de Pontevedra extenderon o 24 de novembro o conflito a todas aquelas persoas que traballen no sector da limpeza, xa que entregaron no rexistro unha nova convocatoria de folga, desta volta para todo o sector da limpeza o vindeiro 3 de decembro, mesmo para aquelas que teñen convenio propio, polo que o paro afectaría aos catro hospitais da provincia e tamén aos centros educativos públicos de toda Pontevedra, asi como todos os edificios das distintas administracións.

Marchas polo centro de Vigo, sinalando a aquelas empresas que continúan a vulnerar o dereito de folga, visitas dos grupos de piquetes a áreas comerciais e outras accións, foron o centro das mobilizacións do sexto dia de folga na loita por un convenio xusto da limpeza de edificios e locais da provincia de Pontevedra. Fóra da cidade olívica, o grupo de piquetes de Pontevedra continuaba extendendo o conflito cara outras zonas da comarca, como o concello de Sanxenxo ou o porto de Marín, ademais do mantemento do paro na zona do Salnés.

Cuarta xornada de folga indefinida no sector da limpeza, que levou ás piquetes a realizar novas accións como a ocupación da sede da Cámara de Comercio en Pontevedra, ou a unha manifestación ao longo de toda a mañá en Vigo de perto de 400 traballadoras/es do sector polo centro da cidade. Na tarde do 20 de novembro había convocada unha reunión con Pilar Cancela, directora xeral de Relacións Laborais, mais a patronal non compareceu ao asegurar que non negocia con "vándalos".

Na mañá do 19 de novembro os piquetes informativos chegaban ás portas do edificio da Xunta de Galiza en Vigo. Tentaron entrar, máis a Policia Autonómica bloqueou as entradas. Pouco despois unha actuación desmedida dos antidistubios contra as/os traballadoras/es que estaban facendo unha sentada diante das instalacións da Xunta de Galiza provocou que dúas das traballadoras foran empurradas e pisadas polos antidisturbios, o que conlevou que unha delas tivera convulsións e que outra quedara mancada nunha perna. Dúas ambulancias tiveron que trasladalas a Urxencias.