A CIG-Banca desenvolveu unha concentración diante das instalacións de Gas Natural-Unión Fenosa en Vigo este mércores 15 de maio en solidariedade coas traballadoras/es de Teleperphormance da Coruña e para reclamar o mantemento do servizo de atención telefónica en galego por parte da compañía eléctrica.

A edición 2013 do Correlingua -carreira pola lingua do alumnado de todos os ciclos educativos- chegou este luns ás rúas da Coruña. A carreira, que partiu pouco despois das 11 horas da explanada da Torre de Hércules, contou coa participación de arredor de 4.000 escolares procedentes de distintos centros da comarca da Coruña.

A CIG-Ensino viña denunciando o funcionamento deficitario da aplicación web de correo electrónico da Consellaría de Educación, xa que moitas veces era difícil acceder e impedía a xestión normal dos centros educativos. A Consellaría de Educación vén de modificar aplicación web do correo electrónico e agora o idioma de entrada por defecto é o español.

A CIG-Ensino entregou este luns no Rexistro da Xunta de Galiza, 10.172 sinaturas de docentes recollidas nos centros de ensino, e dirixidas ao conselleiro de Educación, nas que o profesorado fai constar o seu rexeitamento máis absoluto ao anteproxecto da LOMCE por tratarse dunha lei “mercantilista e reaccionaria, recentralizadora e españolizadora, elitista e clasista, agresiva co profesorado, antidemocrática, reforzadora da confesionalidade e contraria ao ensino laico”.

A edición 2013 do Correlingua, carreira pola lingua do alumnado de todos os ciclos educativos, organizada pola CIG-Ensino, a Asociación Socio-Pedagóxica Galega (AS-PG), a Mesa pola Normalización Lingüística e os Concellos de Pontevedra, Vigo, Lugo e Ourense xunto coa Deputación de Lugo, comezou xa con diferentes actividades nos centros educativos de Galiza que farán a súa achega participando nos concursos de Manifesto, Banda Deseñada, Vídeo e Cantalingua.

A CIG fai un chamamento a todas as galegas e galegos a participar na manifestación convocada pola Plataforma Cidadá ‘Queremos Galego’, baixo o lema Pola lingua que nos une. Queremos galego na escola, para o vindeiro domingo día 27 de xaneiro, con saída ás 12:00 horas da Alameda compostelá. A Plataforma recibiu o apoio dos máis de 700 colectivos e entidades sociais que a conforman, entre elas a central sindical, e de todas as organizacións con representación parlamentar, agás o PP.

A Consellaría inicia lexislatura e inaugura o ano 2013 aplicando novos recortes para a promoción da nosa lingua por parte dos Equipos de Normalización dos centros educativos que este ano verán recortadas tanto as partidas destinadas aos proxectos de innovación en normalización lingüística, como as destinadas a proxectos de fomento do uso do galego dos centros educativos.